‘അമ്മയെ ചാരിറ്റബിള്‍ സൊസൈറ്റിയായി രജിസ്റ്റര്‍ ചെയ്തത് ഞാന്‍, സംഘടനയ്ക്ക് അവമതിപ്പുണ്ടാക്കിയത് ആരെന്ന് പരിശോധിക്കണം’: കെ.ബി ഗണേഷ് കുമാര്‍

താരസംഘടന ‘അമ്മ’യുടെ ജനറല്‍ സെക്രട്ടറി ഇടവേള ബാബുവിന് മറുപടിയുമായി നടനും എംഎല്‍എയുമായ ഗണേഷ് കുമാര്‍. താനാണ് അമ്മയെ ചാരിറ്റബിള്‍ സൊസൈറ്റിയായി രജിസ്റ്റര്‍ ചെയ്തതെന്ന് ഗണേഷ് കുമാര്‍ പറഞ്ഞു. സംഘടനക്ക് അവമതിപ്പുണ്ടാക്കുന്നത് താനാണോ സെക്രട്ടറി ഇടവേള ബാബുവാണോ എന്ന് പരിശോധിക്കണം. ഇടവേള ബാബുവിനോട് താന്‍ ചോദിച്ച ചോദ്യത്തിന് ഒന്നിനും ഉത്തരം കിട്ടിയിട്ടില്ല. അമ്മ ക്ലബ്ബാണെന്ന പ്രസ്താവനയില്‍ ഇടവേള ബാബു ഉറച്ച് നില്‍ക്കുന്നത് എന്തിനാണെന്നും ഗണേഷ് കുമാര്‍ ചോദിച്ചു. വാര്‍ത്താസമ്മേളനത്തിലായിരുന്നു ഗണേഷ് കുമാര്‍ ഇക്കാര്യങ്ങള്‍ പറഞ്ഞത്.

സംഘടനയെ സ്വകാര്യവത്കരിക്കുന്നതിനെതിരെ കത്ത് നല്‍കാനാണ് തീരുമാനം. സംഘടനയില്‍ എകാധിപത്യ പ്രവണത ശരിയല്ല. അതിജീവിത ഉന്നയിച്ച കാര്യങ്ങള്‍ക്ക് മറുപടി പറയണം. നടന്‍ ദിലീപിന്റെ പ്രതിയായ കേസില്‍ സ്വീകരിച്ച നിലപാട് വിജയ് ബാബുവിനോടും സ്വീകരിക്കണമെന്നും ഗണേഷ് കുമാര്‍ പറഞ്ഞു. തന്റെ മണ്ഡലത്തിലെ പാവങ്ങള്‍ക്ക് പലരും സഹായിച്ച് വീടുവച്ച് കൊടുത്തിട്ടുണ്ട്. അമ്മ മുഖേനെ രണ്ട് പേര്‍ വീട് കിട്ടിയിട്ടുണ്ടെന്നും അവ ഉപയോഗിച്ച് വോട്ട് പിടിച്ചിട്ടില്ലെന്നും ഗണേഷ് കുമാര്‍ പറഞ്ഞു. നടന്‍ ഷമ്മി തിലകന്റെ ആരോപണത്തിന് മറുപടി പറയവേയാണ് ഗണേഷ് കുമാര്‍ ഇക്കാര്യം വ്യക്തമാക്കിയത്.

ഇന്നലെയാണ് ഗണേഷ് കുമാറിന്റെ ആരോപണങ്ങള്‍ക്ക് മറുപടിയുമായി ഇടവേള ബാബു രംഗത്തെത്തിയത്. ലയണ്‍സ് ക്ലബ്ബ്, റോട്ടറി ക്ലബ് തുടങ്ങിയ പ്രസ്ഥാനങ്ങളെ വില കുറച്ചല്ല കാണുന്നതെന്നും ‘അമ്മ’ ക്ലബ്ബിന്റെ നിലവാരത്തിലേക്ക് താഴരുതെന്ന് ഗണേഷ് കുമാര്‍ പറഞ്ഞത് എന്തുകൊണ്ടാണെന്ന് മനസിലായില്ലെന്നുമാണ് ഇടവേള ബാബു പറഞ്ഞിരുന്നത്. കോടതി മുന്‍കൂര്‍ ജാമ്യം അനുവദിച്ച ആള്‍ക്കെതിരെ എന്ത് നടപടിയാണ് എടുക്കേണ്ടത്. ബിനീഷ് കോടിയേരിക്കെതിരെ കേസ് വന്നപ്പോള്‍ നടപടിയെടുക്കരുതെന്ന് പറഞ്ഞവരില്‍ ഗണേഷുമുണ്ട്. പിന്നെ എന്താണ് ഇപ്പോള്‍ ഇരട്ട നീതിയെന്നും ഇടവേള ബാബു ചോദിച്ചിരുന്നു.