മതിയായ രേഖകള് ഇല്ലാതെ പ്രായപൂര്ത്തിയാകാത്ത പെണ്കുട്ടികളെ കേരളത്തിലെത്തിച്ച സംഭവത്തില് പാസ്റ്റര് അറസ്റ്റില്. പെരുമ്പാവൂരിലെ കരുണ ചാരിറ്റബിള് ട്രസ്റ്റ് ഡയറക്ടര് ജേക്കബ് വര്ഗീസ് ആണ് അറസ്റ്റിലായത്. കരുണ ചാരിറ്റബിള് ട്രസ്റ്റ് നിയമവിരുദ്ധമായാണ് പ്രവര്ത്തിക്കുന്നത് എന്ന് അന്വേഷണത്തില് കണ്ടെത്തിയിരുന്നു.
പന്ത്രണ്ട് കുട്ടികളെ നിയമ വിരുദ്ധമായി കൊണ്ടുവന്ന സംഭവത്തില് ഇടനിലക്കാരെ ഇന്നലെ കോഴിക്കോട് റെയില്വേ പൊലീസ് അറസ്റ്റ് ചെയ്തിരുന്നു. രാജസ്ഥാന് സ്വദേശികളായ ലോകേഷ് കുമാര് ശ്യാം ലാല് എന്നിവരാണ് അറസ്റ്റിലായത്. ചൊവ്വാഴ്ച രാത്രി ഓഖ എക്സ്പ്രസിലാണ് കുട്ടികളെ എത്തിച്ചത്. സംശയം തോന്നിയ യാത്രക്കാര്, റെയില്വേ പൊലീസിനെ വിവരം അറിയിക്കുകയായിരുന്നു. കുട്ടികള്ക്ക് ഒപ്പം ആറ് മുതിര്ന്നവരാണ് ഉണ്ടായിരുന്നത്. ഇവരെ കസ്റ്റഡിയില് എടുത്ത് പൊലീസ് ചോദ്യം ചെയ്തു. നാല് പേര് രക്ഷിതാക്കളാണെന്ന് ബോധ്യപ്പെട്ടു. മറ്റ് രണ്ട് പേര്ക്കെതിരെയാണ് കേസെടുത്തത്. തുടര്ന്ന് നടത്തിയ അന്വേഷണത്തിലാണ് പാസ്റ്ററിനെ അറസ്റ്റ് ചെയ്തത്.
പെരുമ്പാവൂരിലെ കരുണാലയത്തിലേക്കാണ് കുട്ടികളെ കൊണ്ടുവന്നതെന്ന് ഒപ്പമുണ്ടായിരുന്നവര് മൊഴി നല്കിയിരുന്നത്. തുടര്ന്ന് നടത്തിയ അന്വേഷണത്തിലാണ് കരുണ ചാരിറ്റബിള് ട്രസ്റ്റ് ജുവനൈല് ജസ്റ്റിസ് നിയമപ്രകാരമുള്ള അനുമതി ഇല്ലാതെയാണ് പ്രവര്ത്തിക്കുന്നത് കണ്ടെത്തിയത്. പന്ത്രണ്ട് കുട്ടികളെയും ശിശുക്ഷേമ സമിതിയിലേക്ക് മാറ്റിയിട്ടുണ്ട്.