പാൻ പരാഗ് പോലുള്ള പാൻ മസാലകൾ ആരോഗ്യത്തിന് വലിയ രീതിയിൽ ദൂഷ്യം ഉണ്ടാക്കുന്ന വസ്തുക്കൾ ആണ്. ശരീരികമായും മാനസികമായും ഇത് മനുഷ്യനിൽ അപകടം ഉണ്ടാക്കുന്ന വസ്തുവാണ്.
പാൻമസാല സ്ഥിരമായി ഉപയോഗിക്കുന്നവവരുടെ മുഖം ഭാവഭേദമില്ലാത്ത അവസ്ഥയിലെത്താനും സാധ്യതയുണ്ട്. ഉറക്കക്ഷീണം, കുഴിഞ്ഞ കണ്ണകുൾ, കറപിടിച്ച പല്ലുകൾ, തുടിപ്പ് നഷ്ടപ്പെട്ട കവിളുകൾ, പാൻമസാലമയുടെ കുത്തുന്ന ഗന്ധം, എപ്പോഴും അസ്വസ്ഥത, ഇടക്കിടെ തുപ്പുന്ന ശീലം, അലക്ഷ്യമായ വസ്ത്രരീതി എന്നിവ ഇവരുടെ പ്രത്യേകതകളാണ്.
കുറെകാലം പാൻമസാല വായ്ക്കുള്ളിലെ ഏതെങ്കിലും ഭാഗത്ത് സ്ഥിരമായി വച്ചാൽ അവിടത്തെ നിറം മാറുകയും എരിച്ചിലും പുകച്ചിലും അനുഭവപ്പെടുകയും ചെയ്യുന്നു. കാലക്രമേണ ആ ഭാഗത്തെ മാംസം ദ്രവിക്കുകയും, ദ്രവിച്ചുപോയ ഭാഗത്ത് ഒരു ദ്വാരം പ്രത്യക്ഷപ്പെടുകയും ചെയ്യാം.
പാൻമസാലയിലടങ്ങിയിട്ടുള്ള ചേരുവകളിൽ പലതും കാൻസറിന് വഴിതെളിയിക്കുന്നവയാണ്. ഇവ ചർമത്തിന്റെ മൃദുലപേശികളെ കടന്നാക്രമിച്ച് ചർമത്തിന്റെ ഇലാസ്തികതയെ നശിപ്പിക്കുന്നു.
അങ്ങനെ വായിലെ തൊലി ഉരിഞ്ഞ് പോകുന്നതുമൂലം സബ് മ്യൂകസ് ഫൈബ്രോസിസ് എന്ന രോഗം പ്രത്യക്ഷമാകുന്നു. പ്രത്യക്ഷത്തിൽ ഇത് കാൻസറല്ലെങ്കിലും കാൻസറിന് മുന്നോടിയായുള്ള അവസ്ഥയാണ്. ഇക്കൂട്ടർക്ക് സാധാരണ ആളുകളേക്കാൾ കാൻസർ പിടിപെടാനുള്ള സാധ്യത 400 ഇരട്ടിയാണ്.
പാൻമസാലശീലക്കാരിൽ കണ്ടുവരുന്ന മറ്റൊരു ആരോഗ്യപ്രശ്നമാണ് ലുക്കോപ്ലാക്കിയ. വായിൽ വെളുത്ത പാടുകൾ കാണുന്നതാണ് രോഗലക്ഷണം. ഏതാനും വർഷങ്ങൾക്കുള്ളിൽ ഇത് ത്വക്കിൽ കാണപ്പെടുന്ന സ്കാമസ് സെൽ കാൻസറായി മാറാം. ഇതുകൂടാതെ തൊണ്ട, അന്നനാളം, ആമാശയം എന്നീ ഭാഗങ്ങളിലും പാൻമസാല കാൻസർ ഉണ്ടാക്കാം.
മാനസിക പ്രശ്നങ്ങൾക്കും പാൻ മസാല ഉപയോഗം കാരണമാകുന്നു.
മാനസിക പ്രശ്നങ്ങൾ
പാൻമസാലകൾ ഉണ്ടാക്കുന്ന മാനസികപ്രശ്നങ്ങൾ നിരവധിയാണ്. ഇത് ഉപയോഗിക്കുന്നവർക്ക് അകാരണമായ സന്തോഷവും ദുഃഖവും മാറിമാറി അനുഭവപ്പെടാം.
പെട്ടെന്നുള്ള ദേഷ്യം, വെറുപ്പ്, അക്രമവാസന, എടുത്തുചാട്ടം, നിരാശ എന്നിങ്ങനെയുള്ള വൈകാരികാവസ്ഥകളും ഇവരിൽ കാണുന്നുണ്ട്.
യുക്തമായ തീരുമാനങ്ങൾ എടുക്കാൻ കഴിയാതിരിക്കുക, ഉത്കണ്ഠ, ആത്മവിശ്വാസക്കുറവ്, അന്തർമുഖത്വം, അകാരണമായ പേടി, മറവി, ആത്മഹത്യാ ചിന്ത, ലൈംഗിക ശേഷിക്കുറവ്, ലൈംഗിക വൈകൃതങ്ങൾ, എന്നിവയും പാൻമസാല ശീലക്കാരിൽ കൂടുതലാണ്.
ഇത് കൂടാതെ പാൻമസാലയിൽ അടങ്ങിയിട്ടുള്ള രാസവസ്തുക്കളിൽ ചിലത് ഡി.എൻ.എ.യുടെ ഘടനയിൽ തകരാറുണ്ടാക്കാൻ സാധ്യതയുള്ളവയാണ്.