ദേവീപ്രസാദം തയ്യാറാക്കുന്നതിനിടെ തിളച്ച കഞ്ഞിയില് വീണ യുവാവിന് ദാരുണാന്ത്യം. തമിഴ്നാട്ടിലെ മധുരയിലാണ് സംഭവം. മുത്തുകുമാര് എന്ന യുവാവാണ് മരിച്ചത്. തമിഴ്നാട്ടിലെ പ്രധാന ഉത്സവങ്ങളിലൊന്നായ ‘ആടി വെള്ളി’യുടെ ഭാഗമായി മധുരയിലെ പഴങ്കാനത്ത് മുത്തു മാരിയമ്മ ക്ഷേത്രത്തില് ദേവീപ്രസാദം തയ്യാറാക്കുന്നതിനിടെയാണ് സംഭവം നടന്നത്.
ആടി വെള്ളി ഉത്സവത്തിന് പൊതുജനങ്ങള്ക്ക് ദേവീപ്രസാദമായി കഞ്ഞി വിതരണം ചെയ്യുന്നത് പതിവാണ്. വലിയ പാത്രങ്ങളില് കഞ്ഞി തയ്യാറാക്കുന്നതിനിടെ മുത്തുകുമാര് തലകറങ്ങി വീഴുകയായിരുന്നു. ജൂലൈ 29നാണ് അപകടം നടന്നത്.
നാട്ടുകാര് ഉടന് തന്നെ രക്ഷാപ്രവര്ത്തനം ആരംഭിച്ചെങ്കിലും പാത്രത്തില് നിന്ന് ഇയാളെ പുറത്തെടുക്കാനായില്ല. ഒടുവില് പാത്രം മറിച്ചിട്ടാണ് പുറത്തെടുത്തത്. തുടര്ന്ന് മുത്തുകുമാറിനെ ആശുപത്രിയില് പ്രവേശിപ്പിച്ചു. ശരീരത്തില് 65 ശതമാനത്തിലധികം പൊള്ളലേറ്റിരുന്നു. ചികിത്സയിലിരിക്കെയാണ് അന്ത്യം. സംഭവത്തില് പൊലീസ് കേസെടുത്തിരുന്നു. അന്വേഷണത്തില് മുത്തുകുമാര് കഞ്ഞിയില് വീഴുന്ന സിസിടിവി ദൃശ്യങ്ങള് ലഭിച്ചിരുന്നു.