ലോക അത്ലറ്റിക് ചാമ്പ്യന്ഷിപ്പില് ജാവലിന് ത്രോയില് ഇന്ത്യയുടെ നീരജ് ചോപ്രക്ക് വെള്ളി. 88.13 മീറ്റര് ദൂരം പിന്നിട്ടാണ് നീരജ് വെള്ളി നേടിയത്. ലോക അത്ലറ്റിക് ചാമ്പ്യന്ഷിപില് മെഡല് നേടുന്ന ആദ്യ ഇന്ത്യന് പുരുഷ താരം എന്ന ചരിത്ര നേട്ടം കൂടിയാണ് നീരജ് ചോപ്ര സ്വന്തമാക്കിയത്. 90.46 മീറ്റര് എറിഞ്ഞ ഗ്രനഡയുടെ ആന്ഡേഴ്സണ് പീറ്റേഴ്സണാണ് സ്വര്ണം നേടിയത്.
നാലാം ശ്രമത്തിലാണ് ചോപ്ര വെള്ളി ദൂരം കണ്ടെത്തിയത്. ഫൈനലില് നീരജിന്റെ ആദ്യ ശ്രമം തന്നെ ഫൗളായിരുന്നു. രണ്ടാം ശ്രമത്തില് 82.39 മീറ്റര്. മൂന്നാം ശ്രമത്തില് 86.37 മീറ്റര് കണ്ടെത്തിയ നീരജ് നാലാം ശ്രമത്തിലാണ് വെള്ളിയിലെത്തിയത്. 2003 പാരീസ് ലോക ചാമ്പ്യന്ഷിപ്പില് 6.70 മീറ്റര് ചാടി വെങ്കലം നേടിയ മലയാളിയായ ലോംഗ്ജമ്പ് താരം അഞ്ജു ബോബി ജോര്ജിന് ശേഷം ലോക അത്ലറ്റിക്സില് ഇന്ത്യ നേടുന്ന രണ്ടാമത്തെ മെഡല് മാത്രമാണിത്.
19 വര്ഷത്തെ കാത്തിരിപ്പിനു ശേഷമാണ് ലോക അത്ലറ്റിക്സ് ചാമ്പ്യന്ഷിപ്പില് ഇന്ത്യ മെഡല് നേടുന്നതെന്ന പ്രത്യേകതയുമുണ്ട്. അതേസമയം, ഇന്ത്യയുടെ മറ്റൊരു പ്രതീക്ഷയായിരുന്ന രോഹിത് യാദവ് 10ാം സ്ഥാനത്തോടെ മെഡല് പോരാട്ടത്തില് നിന്ന് പുറത്തായി. 78.72 മീറ്ററാണ് രോഹിത്തിന്റെ മികച്ച ദൂരം.