മലയാളി പ്രേക്ഷകർ ഏറെ ആവേശത്തോടെ കാത്തിരിക്കുന്ന ചിത്രമാണ് സിബിഐ 5. സി ബി ഐ സീരീസിലെ അഞ്ചാമത്തെ ചിത്രമാണ് ഇത്. ഈ സിനിമയുടെ ചിത്രീകരണം ഇപ്പോൾ പുരോഗമിച്ചുകൊണ്ടിരിക്കുകയാണ്. സേതുരാമയ്യർ സിബിഐ ആയി മമ്മൂട്ടി സിനിമയുടെ ലൊക്കേഷനിൽ ജോയിൻ ചെയ്തുകഴിഞ്ഞു. താരം തന്നെയാണ് ഈ വീഡിയോ സമൂഹ മാധ്യമങ്ങൾ വഴി പങ്കുവെച്ചത്. എല്ലാവരെയും തൊഴുതുകൊണ്ട് അഭിസംബോധന ചെയ്ത സെറ്റിലേക്ക് പ്രവേശിക്കുന്ന മമ്മൂട്ടിയെ ആണ് വീഡിയോയിൽ കാണാൻ സാധിക്കുന്നത്.
സിബിഐ സീരീസിലെ അതേ ബാഗ്രൗണ്ട് മ്യൂസിക് ഇട്ടു കൊണ്ടാണ് വീഡിയോ പുറത്തുവിട്ടിരിക്കുന്നത്. കഴിഞ്ഞ മാസം 29ന് ആയിരുന്നു സിനിമയുടെ ഷൂട്ടിങ് ആരംഭിച്ചത്. എന്നാൽ മമ്മൂട്ടി അന്നുമുതൽ ഈ സിനിമയുടെ ഭാഗമായിരുന്നില്ല. ലിജോ ജോസ് പെല്ലിശ്ശേരി സംവിധാനം ചെയ്യുന്ന സിനിമയുടെ ചിത്രീകരണ തിരക്കിലായിരുന്നു മമ്മൂട്ടി. ആ സിനിമ പാക്കപ്പ് ചെയ്തതിനുശേഷമാണ് ഇപ്പോൾ ഈ സിനിമയുടെ ഭാഗമായിരിക്കുന്നത്. കെ മധു തന്നെയാണ് സിനിമയുടെ സംവിധാനം നിർവഹിക്കുന്നത്. എസ് എൻ സ്വാമി തന്നെയാണ് സിനിമയ്ക്ക് തിരക്കഥ എഴുതുന്നത്.
ആദ്യ നാല് ഭാഗങ്ങളെ പോലെതന്നെ അത്യന്തം സസ്പെൻസ് നിറഞ്ഞ കഥാഗതി ആണ് ചിത്രത്തിന് ഉള്ളത്. സിനിമയുടെ സസ്പെൻസ് പുറത്തു പോകാതിരിക്കുവാൻ എന്തൊക്കെ കാര്യങ്ങളാണ് അണിയറപ്രവർത്തകർ ശ്രദ്ധിക്കുന്നത് എന്നറിയുമോ? സിനിമയുടെ ലൊക്കേഷനിലേക്ക് ഒരാളെപ്പോലും പ്രവേശിക്കുന്നില്ല. അതുപോലെതന്നെ സിനിമയുടെ ഷൂട്ടിങ് നടക്കുന്ന സമയത്ത് അണിയറപ്രവർത്തകർക്ക് പോലും ആ ഭാഗത്ത് നിൽക്കരുതെന്നാണ് നിർദ്ദേശം നൽകിയിരിക്കുന്നത് എന്നാണ് റിപ്പോർട്ടുകൾ സൂചിപ്പിക്കുന്നത്. ഏറ്റവും വലിയ വസ്തുത ഇതൊന്നുമല്ല. അഭിനയിക്കുന്ന വ്യക്തികളിൽ മമ്മൂട്ടിക്ക് മാത്രമാണ് സിനിമയുടെ കഥ പൂർണമായി അറിയുന്നത്. വേറെ ഒരാൾക്ക് പോലും സിനിമയുടെ കഥ പൂർണമായി അറിയില്ല എന്നാണ് പറയപ്പെടുന്നത്. അതുകൊണ്ടുതന്നെ പ്രേക്ഷകർക്ക് തിയേറ്ററിൽ നിന്നും ലഭിക്കുന്ന അതേ ഫസ്റ്റ് ടൈം അനുഭൂതി ആയിരിക്കും സിനിമയിലെ അഭിനേതാക്കൾക്ക് പോലും ലഭിക്കുന്നത് എന്നതായിരിക്കും പ്രത്യേകത.
എറണാകുളത്ത് ആണ് സിനിമയുടെ ചിത്രീകരണം നടന്നുകൊണ്ടിരിക്കുന്നത്. ഇതിനു പുറമേ തിരുവനന്തപുരം, ഹൈദരാബാദ്, ഡൽഹി എന്നിവിടങ്ങളിൽ നിന്നും ഷൂട്ടിംഗ് നടക്കാൻ ഇരിക്കുന്നു. 1988 വർഷത്തിലാണ് ഈ സീരീസിലെ ആദ്യത്തെ സിനിമ പുറത്തിറങ്ങിയത്. ഒരു സിബിഐ ഡയറിക്കുറിപ്പ് എന്നായിരുന്നു സിനിമയുടെ പേര്. പിന്നീട് മൂന്ന് സിനിമകളാണ് റിലീസ് ചെയ്തത്. ഇതെല്ലാം തന്നെ വലിയ ബോക്സ് ഓഫീസ് വിജയങ്ങളായിരുന്നു.