‘അയാള്‍ മോശമാണെന്നറിഞ്ഞിട്ടും എന്തിന് വീണ്ടും പോയി’: വിജയ് ബാബു വിഷയത്തില്‍ മല്ലിക സുകുമാരന്‍

നടനും നിര്‍മാതാവുമായ വിജയ് ബാബുവിനെതിരായ പീഡന കേസില്‍ പ്രതികരിച്ച് നടി മല്ലികാ സുകുമാരന്‍. അയാള്‍ മോശമാണെന്നറിഞ്ഞിട്ടും ആ പെണ്‍കുട്ടി എന്തിനാണ് വീണ്ടും അയാളുടെ അടുത്തേയ്ക്ക് പോയതെന്ന് മല്ലികാ സുകുമാരന്‍ ചോദിച്ചു. ഒരു മാധ്യമത്തിന് നല്‍കിയ അഭിമുഖത്തിലായിരുന്നു മല്ലികാ സുകുമാരന്റെ പ്രതികരണം.

വിളിച്ചു വരുത്തി ഒന്നിലേറെ തവണ പീഡിപ്പിച്ചു എന്നാണ് പെണ്‍കുട്ടി പറഞ്ഞത്. പത്തൊന്‍പത് തവണ പീഡിപ്പിച്ചു എന്നും പറയുന്നു. അത് സത്യസന്ധമായി തോന്നുന്നില്ല. ഒരു തവണ ദുരനുഭവം ഉണ്ടായാല്‍ അത് മറ്റാരെയെങ്കിലും അറിയിക്കേണ്ടതല്ലേ? അതൊന്നും ചെയ്യാതെ ഒരു സുപ്രഭാതത്തില്‍ 19 തവണ പീഡിപ്പിച്ചു എന്ന് പറയുന്നതില്‍ കാര്യമുള്ളതായി തോന്നുന്നില്ലെന്നും മല്ലിക കൂട്ടിച്ചേര്‍ത്തു.

നടിയെ ആക്രമിച്ച സംഭവത്തില്‍ പൂര്‍ണമായും അതിജീവിതയ്‌ക്കൊപ്പമാണ്. ജോലി ചെയ്യാന്‍ പോയ കുട്ടിയാണ് ആക്രമിക്കപ്പെട്ടതെന്നും അതിന്റെ എല്ലാ വശങ്ങളും തനിക്കറിയാമെന്നും മല്ലിക കൂട്ടിച്ചേര്‍ത്തു.