സംസ്ഥാനത്ത് ജനുവരി 10 മുതല് തന്നെ മുതിര്ന്നവര്ക്കുള്ള കൊവിഡ് വാക്സിന് ബൂസ്റ്റര് ഡോസ് വിതരണം ആരംഭിക്കുമെന്ന് ആരോഗ്യമന്ത്രി വീണാ ജോര്ജ്. കൗമാരക്കാരായ കുട്ടികള്ക്ക് വാക്സിന് നല്കുന്നതിനുള്ള നടപടികള് നാളെ മുതല് ആരംഭിക്കുമെന്നും മന്ത്രി അറിയിച്ചു.
15 മുതല് 18 വരെ പ്രായമുള്ളവര്ക്കായി പ്രത്യേക വാക്സിനേഷന് കര്മ്മപദ്ധതി തയ്യാറാക്കിയാണ് ആരോഗ്യവകുപ്പ് മുന്നോട്ട് പോകുന്നതെന്ന് മന്ത്രി പറഞ്ഞു. കൊവിന് പോര്ട്ടല് വഴി ഇന്നലെ വൈകീട്ട് മൂന്ന് മണി മുതല് രജിസ്ട്രേഷന് ആരംഭിച്ചു. സംസ്ഥാനത്താകെ പതിനഞ്ച് ലക്ഷം കൗമാരക്കാര്ക്കാണ് വാക്സിന് നല്കേണ്ടത്. ഇതിനായി അഞ്ച് ലക്ഷം ഡോസ് കൊവാക്സിന് സംസ്ഥാനത്ത് എത്തിക്കും. രജിസ്ട്രേഷന് നടത്താത്തവര്ക്ക് വാക്സിനേഷന് കേന്ദ്രങ്ങളിലും സ്പോര്ട്ട് രജിസ്ട്രേഷന് ഉണ്ടാകും. വിദ്യാര്ത്ഥികള്ക്ക് സ്കൂളുകള് വഴിയും വാക്സിന് സ്വീകരിക്കാം. കൗമാരക്കാരുടെ വാക്സിനേഷന് കേന്ദ്രം പെട്ടെന്ന് തിരിച്ചറിയാന് കവാടത്തില് പിങ്ക് ബോര്ഡ് പ്രദര്ശിപ്പിക്കുമെന്നും മന്ത്രി പറഞ്ഞു.
സംസ്ഥാനത്ത് ഇതുവരെ ഒമിക്രോണിന്റെ സമൂഹ വ്യാപനം നടന്നിട്ടില്ലെന്നും ആരോഗ്യമന്ത്രി വ്യക്തമാക്കി. ഒമിക്രോണ് വ്യാപനം തടയുന്നതിന് സാധ്യമായ എല്ലാ നടപടികളും ആരോഗ്യവകുപ്പ് സ്വീകരിച്ചിട്ടുണ്ട്. രോഗവ്യാപനം തടയുന്നതിന് എല്ലാവരുടെ ഭാഗത്തു നിന്നും പ്രത്യേകശ്രദ്ധ ഉണ്ടാകണമെന്നും ആരോഗ്യമന്ത്രി കൂട്ടിച്ചേര്ത്തു.