കോണ്ഗ്രസ് അധ്യക്ഷ സ്ഥാനത്തേക്ക് മത്സരിക്കുമെന്ന് ശശി തരൂര് എം.പി. ഭാരത് ജോഡോ യാത്രക്കിടെ അദ്ദേഹം രാഹുല് ഗാന്ധിയുമായി കൂടിക്കാഴ്ച നടത്തി. ഭൂരിഭാഗം പ്രവര്ത്തകരും മത്സരിക്കണമെന്ന് ആവശ്യപ്പെട്ടിട്ടുണ്ട്. കേരളത്തില്നിന്നും പിന്തുണയുണ്ടാകുമെന്നും ശശി തരൂര് പറഞ്ഞു.
അധ്യക്ഷസ്ഥാനത്തേക്ക് ആര്ക്കും മത്സരിക്കാം. അത് കോണ്ഗ്രസിന്റെ ജനാധിപത്യത്തിന്റെ തെളിവാണെന്നും അദ്ദേഹം പറഞ്ഞു. ഗാന്ധി കുടുംബത്തിലെ മൂന്ന് നേതാക്കളും മത്സരിക്കുന്നതില് ഒരു പ്രശ്നവുമില്ലെന്ന് തന്നോട് നേരിട്ട് പറഞ്ഞിട്ടുണ്ട്. ഔദ്യോഗിക സ്ഥാനാര്ഥികളില്ലെന്ന് അവര് വ്യക്തമാക്കിയിട്ടുണ്ട്. സെപ്റ്റംബര് 30ന് ശേഷം കൂടുതല് പ്രതികരിക്കാമെന്നും അദ്ദേഹം പറഞ്ഞു. അതേസമയം, രാജസ്ഥാനിലെ പ്രതിസന്ധിയുമായി ബന്ധപ്പെട്ട് പ്രതികരിക്കാന് അദ്ദേഹം തയ്യാറായില്ല.
കോണ്ഗ്രസ് അധ്യക്ഷ സ്ഥാനത്തേക്കുള്ള തെരഞ്ഞെടുപ്പില് നാമനിര്ദേശ പത്രികാ സമര്പ്പണം ആരംഭിച്ചിട്ടുണ്ട്. കഴിഞ്ഞ ദിവസം ശശി തരൂരിന് വേണ്ടി സ്റ്റാഫ് നാമനിര്ദേശ പത്രിക വാങ്ങിയിരുന്നു. രാജസ്ഥാന് മുഖ്യമന്ത്രി അശോക് ഗെലോട്ടാണ് മത്സരരംഗത്തുള്ള മറ്റൊരു പ്രമുഖന്. ഇരുവരും ഉടന് നാമനിര്ദേശ പത്രിക സമര്പ്പിക്കും.