അമരവാതി എംപിയും നടിയുമായ നവനീത് റാണ കഴിഞ്ഞ ദിവസമാണ് ബി ജെ പിയില്‍ ചേർന്നത്.നിരവധി സിനിമകളില്‍ അഭിനയിച്ചിട്ടുള്ള നവനീത് റാണ മമ്മൂട്ടിയുടെ ലവ് ഇന്‍ സിംഗപ്പൂർ എന്ന ചിത്രത്തിലെ നായികയുമായിരുന്നു.മഹാരാഷ്ട്രയില്‍ നിന്നുള്ള ഒരു എംപി ബി ജെ പിയില്‍ ചേർന്നുവെന്ന വാർത്ത പുറത്ത് വന്നതിന് പിന്നാലെ പല തരത്തിലുള്ള പ്രചരണമാണ് കേരളത്തിലെ സൈബർ ലോകത്ത് അരങ്ങേറിക്കൊണ്ടിരിക്കുന്നത്. ‘മഹാരാഷ്ട്രീയ മറ്റൊരു കോണ്ഗ്രസ് എംപി കൂടി ബി ജെ പിയിലേക്ക്, കോണ്ഗ്രസ് നേതാക്കളുടെ ബി ജെ പിയിലേക്കുള്ള ഒഴുക്ക് തുടരുന്നു’ എന്നിങ്ങനെയായിരുന്നു ഇടത് അണികളുടെ പ്രചരണം.
അതേസമയം യു ഡി എഫ് ഇതിനെ പ്രതിരോധിച്ചുകൊണ്ട് രംഗത്ത് വന്നു. നവനീത് റാണ കോണ്‍ഗ്രസുകാരിയല്ല, കേരളത്തിലെ സി പി എം സഖ്യകക്ഷിയായ എന്‍ സി പിയുടെ എംപിയാണ് നവനീത് എന്നാണ് യു ഡി എഫ് അണികളുടെ പ്രചരണം. ഇതിനായി ഏഷ്യാനെറ്റ് ന്യൂസിന്റെ വാർത്താ കാർഡില്‍ എഡിറ്റ് ചെയ്തുള്ള പ്രചരണവും ഇവർ നടത്തുന്നു. എന്നാല്‍ രണ്ട് മുന്നണി അനുകൂലികളുടേയും അവകാശവാദം തെറ്റാണ് എന്നുള്ളതാണ് വസ്തുത.
സത്യാവസ്ഥ ഇതാണ്.നേരത്തെ എന്‍ സി പി നേതാവായിരുന്നു നവനീത് റാണ എന്നത് സത്യമാണ്. 2014ൽ എൻ സി പി ടിക്കറ്റിൽ അമരാവതിയിൽ നിന്ന് മത്സരിച്ച നവനീത് റാണ ശിവസേനയുടെ ആനന്ദ്റാവു അദ്സുലിനോട് പരാജയപ്പെട്ടു. പിന്നീട് ഇവർ എന്‍ സി പി വിടുകയും ചെയ്തു. എന്നാല്‍ 2019-ൽ എൻ സി പിയുടേയും കോണ്‍ഗ്രസിന്റേയും പിന്തുണയോടെ സ്വതന്ത്ര സ്ഥാനാർത്ഥിയായിട്ട് നവനീത് വീണ്ടും ലോക്സഭയിലേക്ക് മത്സരിച്ചു. ഇത്തവണ അദ്‌സുലിനെ പരാജയപ്പെടുത്തി ലോക്സഭയിലേക്ക് എത്തി. അതായത് സ്വതന്ത്രയായ നവനീതിനെ കോണ്‍ഗ്രസും എന്‍ സി പിയും ഒരു പോലെ പിന്തുണച്ചാണ് വിജയിപ്പിച്ചത്.നവനീതും ഭർത്താവും ബി ജെ പിയെ പിന്തുണച്ച് വരികയാണ്. നവനീത് റാണയുടെ ഭർത്താവായ രവി റാണ ബദ്നേരയില്‍ നിന്നുള്ള സ്വതന്ത്ര എം എല്‍ എയാണ്. ഇദ്ദേഹവും കഴിഞ്ഞ ദിവസം ബി ജെ പിയില്‍ ചേർന്നു.
