നമ്മുടെ എല്ലാവരുടെയും കുട്ടികാലത്തെ നായകന്മാരിൽ ഒരാളാണ് ശക്തിമാനും. തൊണ്ണൂറുകളിൽ ജനിച്ച കുട്ടികളുടെ ബാല്യകാലസ്മരണകൾ ഏറ്റവും മനോഹരമാക്കുന്ന പരിപാടികളിൽ ഒന്നായിരുന്നു ശക്തിമാനും. ദൂരദർശൻ എന്ന ചാനലിൽ ആയിരുന്നു ഈ പരിപാടി സംപ്രേക്ഷണം ചെയ്തത്. ഇപ്പോഴും ഈ പരിപാടി സൂപ്പർഹിറ്റായി ഓൺലൈൻ മാധ്യമങ്ങളിൽ ഓടുകയാണ്. മുകേഷ് ഖന്ന എന്ന ബോളിവുഡ് നടനാണ് ശക്തിമാൻ എന്ന കഥാപാത്രത്തെ അവതരിപ്പിച്ചത്. എന്നാൽ ഇപ്പോൾ നാണം കെട്ട ഒരു പ്രസ്താവനയാണ് മുകേഷ് ഖന്ന നടത്തിയിരിക്കുന്നത്.
“സ്ത്രീകൾ ജോലിക്ക് പോകാൻ തുടങ്ങിയതുമുതലാണ് മീ ടൂ ആരോപണങ്ങൾ പോലെയുള്ളവ വരാൻ തുടങ്ങിയത്. അതുവരെ ഇതൊന്നും ഇല്ലായിരുന്നു. വീട്ടുജോലി ചെയ്യലാണ് സ്ത്രീകൾക്ക് പറഞ്ഞിട്ടുള്ളത്. പുരുഷന്മാർക്കൊപ്പം ചേർന്ന് പ്രവർത്തിക്കാൻ തുടങ്ങിയത് മുതലാണ് ഇത്തരത്തിലുള്ള വാർത്തകളും നമ്മൾ കേട്ടു തുടങ്ങിയത്.” – ഇതായിരുന്നു മുകേഷ് ഖന്ന ഒരു അഭിമുഖത്തിൽ നടത്തിയ പ്രസ്താവന. മീ ടൂ ആരോപണങ്ങളോട് പ്രതികരിക്കുകയായിരുന്നു ഇയാൾ.
സ്ത്രീകളാണ് ഇത്തരം പ്രശ്നങ്ങൾക്ക് എല്ലാം കാരണം എന്ന രീതിയിൽ ആയിരുന്നു ഇയാളുടെ പ്രസ്താവന. സ്ത്രീകളുടെ ജോലി വീട്ടുജോലി ആണെന്നും, സ്ത്രീകൾ ഈ ജോലിയിൽ മാത്രം ശ്രദ്ധ കേന്ദ്രീകരിച്ചിരുന്ന കാലത്ത് ഇത്തരത്തിലുള്ള ആരോപണങ്ങൾ ഒന്നും തന്നെ ഇല്ലായിരുന്നു എന്നും ഇയാൾ കൂട്ടിച്ചേർത്തു. വലിയ രീതിയിലുള്ള പ്രതിഷേധമാണ് ശക്തിമാൻ നടത്തിയ ഈ പ്രസ്താവനക്ക് ശേഷം സമൂഹമാധ്യമങ്ങളിൽ അരങ്ങേറുന്നത്.
നമ്മുടെ എല്ലാവരുടെയും കുട്ടിക്കാലത്തെ ഹീറോ ഒറ്റദിവസംകൊണ്ട് വില്ലനായി മാറുന്ന കാഴ്ചയാണ് ഇപ്പോൾ കണ്ടുകൊണ്ടിരിക്കുന്നത് എന്നായിരുന്നു സോഷ്യൽ മീഡിയയിൽ മിക്ക ആളുകളുടെയും പ്രതികരണം. മുകേഷ് ഖന്ന നടത്തിയ ഈ സ്ത്രീവിരുദ്ധ പരാമർശത്തിൽ അദ്ദേഹം മാപ്പുപറയണമെന്ന് ആവശ്യമാണ് ഒരുപാടുപേർ ഉന്നയിക്കുന്നത്. കേന്ദ്രം ഭരിക്കുന്ന രാഷ്ട്രീയ പാർട്ടിയോട് വളരെ അടുത്ത സൗഹൃദം സൂക്ഷിക്കുന്ന വ്യക്തി കൂടിയാണ് മുകേഷ് ഖന്ന. അതുകൊണ്ടുതന്നെ പല സർക്കാർ സ്ഥാപനങ്ങളുടേയും അധ്യക്ഷൻ കൂടിയാണ് ഇയാള്.