വിവാഹ വാഗ്ദാനം നല്കി ബലാത്സംഗം ചെയ്തെന്ന പരാതിയില് രാജസ്ഥാനിലെ മന്ത്രിയുടെ മകനെ അറസ്റ്റ് ചെയ്യാന് ഡല്ഹി പൊലീസ് ജയ്പൂരില്. രാജസ്ഥാന് പബ്ലിക് ഹെല്ത്ത് എഞ്ചിനീയറിംഗ് മന്ത്രിയായ മഹേഷ് ജോഷിയുടെ മകന് രോഹിത് ജോഷിയെ അറസ്റ്റ് ചെയ്യാനാണ് പൊലീസ് ജയ്പൂരില് എത്തിയത്.
മന്ത്രിയുടെ ജയ്പൂരിലെ രണ്ടു വസതിയിലടക്കം പൊലീസ് റെയ്ഡ് നടത്തിയെങ്കിലും പ്രതിയെ കണ്ടെത്താനായിട്ടില്ല. ഇയാള് ഒളിവിലാണെന്നാണ് പൊലീസ് പറയുന്നത്. ഇരുപത്തിനാലുകാരിയാണ് മന്ത്രി പുത്രനെതിരെ പരാതിയുമായി പൊലീസിനെ സമീപിച്ചത്. വിവാഹ വാഗ്ദാനം ചെയ്ത് കഴിഞ്ഞ ജനുവരി മുതല് ഏപ്രില് മാസം വരെ ഇയാള് പീഡിപ്പിച്ചെന്നാണ് പരാതി.
ഫേസ്ബുക്കിലൂടെയാണ് ഇരുവരും പരിചയപ്പെടുന്നത്. ആദ്യകൂടിക്കാഴ്ചക്ക് പിന്നാലെ ഇയാള് ഭീഷണിപ്പെടുത്തി തട്ടിക്കൊണ്ടുപോയെന്ന് യുവതി പറയുന്നു. മയക്കുമരുന്ന് നല്കിയാണ് പീഡിപ്പിച്ചതെന്നും നഗ്ന വിഡിയോകളും ചിത്രങ്ങളും മറ്റും പകര്ത്തിയതായും യുവതി പരാതിയില് പറഞ്ഞിരുന്നു.