കുടുക്ക് എന്ന സിനിമയിലെ ഗാനരംഗം പുറത്തിറങ്ങിയതിന് പിന്നാലെ നടി ദുര്ഗ കൃഷ്ണയ്ക്കെതിരെ വ്യാപക വിമര്ശനം ഉയര്ന്നിരുന്നു. നടന് കൃഷ്ണ ശങ്കറുമായുള്ള ലിപ്ലോക്കാണ് വിഷയം. രണ്ട് പേരും ചെയ്തത് ഒരേ ജോലിയാണെങ്കിലും വിമര്ശനം മുഴുവന് നേരിടുന്നത് ദുര്ഗയാണ്. ഇപ്പോഴിതാ ഇതുമായി ബന്ധപ്പെട്ട് പ്രതികരിച്ചിരിക്കുകയാണ് കൃഷ്ണ ശങ്കര്.
കുടുക്ക് സിനിമയിലെ ഗാനരംഗത്തിന്റെ പേരില് ദുര്ഗയുടെ ഭര്ത്താവും വീട്ടുകാരും ഉള്പ്പെടെ വിമശിക്കപ്പെടുന്നതായി കൃഷ്ണ ശങ്കര് പറയുന്നു. രണ്ടു പേരും ചെയ്തത് അവരവരുടെ ജോലിയാണെങ്കിലും വിമര്ശനം മുഴുവന് സ്ത്രീയായ ദുര്ഗ കൃഷ്ണയ്ക്കാണെന്ന് കൃഷ്ണ ശങ്കര് പറയുന്നു. നട്ടെല്ലില്ലാത്തവന് എന്നവരുടെ ഭര്ത്താവിനെ പറയുമ്പോള് എത്ര ആളുകള് ഉണ്ട് അയാളെ പോലെ ഭാര്യയോടുള്ള സ്നേഹവും വിശ്വാസവും അവര് ചെയ്യുന്ന ജോലിയോടുള്ള ബഹുമാനവും ഉള്ളവരെന്ന് കൃഷ്ണ ശങ്കര് ചോദിക്കുന്നു.
ഫേസ്ബുക്ക് പോസ്റ്റിന്റെ പൂര്ണരൂപം
ഇന്ന് കുറച്ചു നേരം മുമ്പ് ദുര്ഗ കൃഷ്ണയുടെ ഒരു കോള് വന്നു. ഞങ്ങള് ഒരുമിച്ചഭിനയിച്ച ഒരു സിനിമയിലെ ഗാന രംഗത്തിലെ സീന് കാരണം ഇപ്പോഴും ഇന്ന് ഈ രാത്രിയിലും ദുര്ഗയെയും അവരുടെ ഹസ്ബന്ഡ് ആയ അര്ജുനെയും വീട്ടുകാരെയും മോശമായി സംസാരിക്കുന്നു. ഇതില് കൂട്ടുപ്രതിയായ ഞാന് എന്റെ വീട്ടില് കുട്ടികളെയും കളിപ്പിച്ച് ഭാര്യയായി സുഖമായി ഉറങ്ങാന് പോകുന്നു. രണ്ടു പേരും ചെയ്തത് അവരവരുടെ ജോലിയാണ്. പക്ഷെ വിമര്ശനം മുഴുവന് സ്ത്രീയായ ദുര്ഗ കൃഷ്ണയ്ക്കാണ്. ഇതിനു മുമ്പ് ഞാന് ഒരു ഇന്റര്വ്യൂവില് പറഞ്ഞത് പോലെ ഒരു നല്ല കഥയുണ്ട്, പക്ഷെ അതില് അഞ്ച് ലിപ് ലോക്കുമുണ്ട് എന്ന് പറഞ്ഞാല് ലിപ്ലോക്കിന്റെ ആശങ്കകള് മാറ്റിവച്ച് ഒരു സെക്കന്ഡ് പോലും ആലോചിക്കാതെ ആ സിനിമ ഞാന് ചെയ്യാം. കാരണം ഒരു നല്ല സിനിമ ചെയ്യുക എന്നതാണ് ഒരു നടന്റെ ലക്ഷ്യം.
പക്ഷെ അത് തന്നെ ഇവര്ക്ക് വരുമ്പോള് കഴിഞ്ഞ പടത്തില് ഇതിന്റെ പേരില് അനുഭവിക്കേണ്ടി വന്ന മോശം experience കൊണ്ട് ആ സിനിമ തന്നെ ഇവര് ഉപേക്ഷിക്കേണ്ടി വന്നാല് അത് അവരുടെ ഏറ്റവും വല്യ സ്വപ്നം ഉപേക്ഷിക്കുന്നതിനു തുല്യമാകും . ഇതിനൊരു മാറ്റം നമ്മള് തന്നെ കൊണ്ട് വരണം , നട്ടെല്ലില്ലാത്തവന് എന്നവരുടെ ഭര്ത്താവിനെ പറയുമ്പോള് എത്ര ആളുകള് ഉണ്ട് അയാളെ പോലെ ഭാര്യയോടുള്ള സ്നേഹവും വിശ്വാസവും അവര് ചെയ്യുന്ന ജോലിയോടുള്ള ബഹുമാനവും ഉള്ളവര്.
അത് കൊണ്ട് ഇത്തരത്തിലുള്ള കമന്റുകള് എഴുതുമ്പോള് ഒരു നിമിഷം മുമ്പ് നിങ്ങള് നിങ്ങളുടെ വീട്ടുകാരെ ഒന്ന് സ്മരിക്കുക.