കൊച്ചി: ഫെബ്രുവരി 22 മുതല് കേരളത്തിലെ തിയേറ്ററുകളില് മലയാള സിനിമകള് റിലീസ് ചെയ്യില്ലെന്ന് തിയേറ്റര് ഉടമകളുടെ സംഘടനയായ ഫിയോക്.
പ്രൊഡ്യൂസര്മാരുടെ ഏകാധിപത്യ നിലപാടുകളില് പ്രതിഷേധിച്ചാണ് തീരുമാനമെന്ന് ഫിയോക് പ്രസിഡന്റ് വിജയകുമാര് മാധ്യമങ്ങളോട് പ്രതികരിച്ചു.
വിവിധ ആവശ്യങ്ങള് ഫിയോക് നിര്മ്മാതാക്കള്ക്ക് മുന്നില് വെച്ചിരുന്നു. എന്നാല് ഇതിനോട് നിര്മ്മാതാക്കള് ഇതുവരെ അനുകൂല നിലപാട് സ്വീകരിച്ചിട്ടില്ല. ഇതില് പ്രതിഷേധിച്ചാണ് തീരുമാനമെന്നും വിജയകുമാര് പറഞ്ഞു.
കരാര് ലംഘിച്ച് നിശ്ചിത ദിവസത്തിന് മുമ്പേ ഒ ടി ടി പ്ലാറ്റ്ഫോമുകള്ക്ക് സിനിമകള് നല്കുന്നത് അവസാനിപ്പിക്കുക,
സിനിമ തിയേറ്ററുകളില് പ്രൊജക്ടര് വയ്ക്കാനുള്ള അവകാശം ഉടമയില് നിലനിര്ത്തുക, തുടങ്ങിയ ആവശ്യങ്ങള് ആണ് ഫിയോക് നിര്മ്മാതാക്കള്ക്ക് മുന്നില് വെച്ചിട്ടുള്ളത്.
അതേസമയം സിനിമ പ്രേമികള് പ്രതീക്ഷയോടെ കാത്തിരിക്കുന്ന നിരവധി ചിത്രങ്ങളാണ് വരും ദിവസങ്ങളില് തീയറ്ററില് എത്താനിരിക്കുന്നത്.
തീയറ്റര് ഉടമകളുടെ ഈ തീരുമാനം ഈ സിനിമകളെ എങ്ങനെ ബാധിക്കുമെന്ന ആശങ്കയിലാണ് സിനിമ പ്രേമികള്.