തെരുവുനായയുടെ കടിയേറ്റ 12കാരി മരിച്ചു. പത്തനംതിട്ട റാന്നി പെരുനാട് സ്വദേശി അഭിരാമിയാണ് മരിച്ചത്. പേവിഷബാധയേറ്റ് കോട്ടയം മെഡിക്കല് കോളജ് ആശുപത്രിയില് ചികിത്സയിലായിരുന്നു. പേവിഷബാധയ്ക്കുള്ള മൂന്ന് ഡോസ് വാക്സിനും കുട്ടി എടുത്തിരുന്നു.
റാന്നി പെരുനാട് മന്ദപ്പുഴ ചേര്ത്തലപ്പടി ഷീനാഭവനില് ഹരീഷിന്റെ മകളായ അഭിരാമിയെ കഴിഞ്ഞ മാസം 14നാണ് തെരുവുനായ കടിച്ചത്. പാല് വാങ്ങാന് പോകവേ പെരുനാട് കാര്മല് എഞ്ചിനീയറിംഗ് കോളജ് റോഡില്വച്ചാണ് കുട്ടിക്ക് തെരുവുനായയുടെ കടിയേല്ക്കുന്നത്. കണ്ണിലും കാലിലും കൈയിലുമായി ഏഴിടത്ത് കടിയേറ്റിരുന്നു. തുടര്ന്ന് കുട്ടിയെ പത്തനംതിട്ട ജനറല് ആശുപത്രിയില് പ്രവേശിപ്പിച്ചു. അവിടെ നിന്നാണ് കുട്ടിക്ക് ആദ്യത്തെ വാക്സിന് എടുക്കുന്നത്.
രണ്ട് വാക്സിന് പെരുനാട് കുടുംബാരോഗ്യ കേന്ദ്രത്തില് നിന്നുമാണ് സ്വീകരിച്ചത്. നാലാമത്തെ വാക്സിന് ഈ മാസം 10ന് എടുക്കണമെന്ന് ആശുപത്രിയില് നിന്ന് അറിയിച്ചിരുന്നു. വെള്ളിയാഴ്ച വൈകിട്ടോടെ അസ്വസ്ഥത അനുഭവപ്പെട്ട കുട്ടിയെ പത്തനംതിട്ട ജനറല് ആശുപത്രിയില് എത്തിച്ചെങ്കിലും സ്ഥിതി ഗുരുതരമായതിനാല് കോട്ടയം മെഡിക്കല് കോളേജിലേക്ക് മാറ്റുകയായിരുന്നു.