ബിസിസിഐയില്നിന്നു ലഭിക്കുന്ന പ്രതിമാസ പെന്ഷന് മാത്രമാണ് ആകെയുള്ള വരുമാനമാര്ഗമെന്ന് മുന് ഇന്ത്യന് ക്രിക്കറ്റ് താരം വിനോദ് കാംബ്ലി. ക്രിക്കറ്റുമായി ബന്ധപ്പെട്ട അസൈന്മെന്റുകള്ക്കായി കാത്തിരിക്കുകയാണ്. സഹായത്തിനായി മുംബൈ ക്രിക്കറ്റ് അസോസിയേഷനെ സമീപിച്ചിട്ടുണ്ടെന്നും അദ്ദേഹം പറഞ്ഞു. മിഡ് ഡേയ്ക്ക് നല്കിയ അഭിമുഖത്തിലാണ് കാംബ്ലി ഇക്കാര്യങ്ങള് പറഞ്ഞത്.
താനൊരു വിരമിച്ച ക്രിക്കറ്ററാണെന്ന് പറഞ്ഞ കാംബ്ലി ബിസിസിഐയുടെ പെന്ഷന് മാത്രമാണ് ആശ്രയമെന്ന് വ്യക്തമാക്കി. അതിന് ബോര്ഡിനോട് കടപ്പെട്ടിരിക്കുന്നു. അതുകൊണ്ടാണ് ഞാന് കുടുംബം നോക്കുന്നതെന്നും കാംബ്ലി പറഞ്ഞു. സാമ്പത്തിക സ്ഥിതിയെ കുറിച്ച് ബാല്യകാല സുഹൃത്തു കൂടിയായ ഇതിഹാസ താരം സച്ചിന് ടെണ്ടുല്ക്കര്ക്ക് അറിയാമോ എന്ന ചോദ്യത്തിന് ‘അദ്ദേഹത്തിന് എല്ലാം അറിയാം. എന്നാല് ആരില്നിന്നും ഒന്നും പ്രതീക്ഷിക്കുന്നില്ല. അദ്ദേഹമാണ് ടെണ്ടുല്ക്കര് മിഡില്സെക്സ് ഗ്ലോബല് അക്കാഡമിയില് ജോലി തന്നത്. താന് സന്തോഷവനായിരുന്നു. അദ്ദേഹം നല്ല സുഹൃത്താണ്. എല്ലായ്പ്പോഴും തനിക്കൊപ്പം നിന്നുവെന്നും കാംബ്ലി പറഞ്ഞു.
കൊവിഡിന് മുമ്പ് ടി20 മുംബൈ ലീഗില് ഒരു ടീമിന്റെ കോച്ചായിരുന്നു കാംബ്ലി. നെരൂളിലെ ടെണ്ടുല്ക്കര് മിഡില് സെക്സ് ഗ്ലോബല് അക്കാഡമിയില് യുവതാരങ്ങളുടെ മെന്ററാണ് അദ്ദേഹം. ഇന്ത്യയ്ക്കായി 104 ഏകദിനങ്ങളും 17 ടെസ്റ്റ് മാച്ചുകളും കളിച്ച താരമാണ് കാംബ്ലി. നാലു ടെസ്റ്റ് സെഞ്ച്വറികളും രണ്ട് ഏകദിന സെഞ്ച്വറികളും ഉള്പ്പെടെ എല്ലാ ഫോര്മാറ്റുകളിലുമായി 3561 റണ്സ് നേടിയിട്ടുണ്ട്.