നടിയെ ആക്രമിച്ച കേസിന്റെ തുടരന്വേഷണം തടയണമെന്നാവശ്യപ്പെട്ട് നടന് ദിലീപ് സമര്പ്പിച്ച ഹര്ജിയെ എതിര്ത്ത് നടി . കക്ഷി ചേരാന് സമയം അനുവദിക്കണമെന്ന് നടി കോടതിയില് അഭ്യര്ത്ഥിച്ചു. ഇതോടെ കേസ് ഹൈക്കോടതി തിങ്കളാഴ്ചത്തേക്ക് മാറ്റി.
കേസിന്റെ വിചാരണ നീട്ടിക്കൊണ്ട് പോകാനാണ് തുടരന്വേഷണം എന്നാണ് ദിലീപിന്റെ വാദം. തുടരന്വേഷണം ആവശ്യപ്പെട്ടുകൊണ്ട് അന്വേഷണ ഉദ്യോസ്ഥര് വിചാരണക്കോടതിയില് നല്കിയിരിക്കുന്ന റിപ്പോര്ട്ട് റദ്ദാക്കണം, നടിയെ ആക്രമിച്ച കേസിലെ വിചാരണ വേഗത്തില് പൂര്ത്തിയാക്കാന് വിചാരണ കോടതിക്ക് നിര്ദേശം നല്കണം എന്നൊക്കെയാണ് ദിലീപ് ഹര്ജിയില് ആവശ്യപ്പെട്ടിട്ടുള്ളത്.
അതേസമയം കുറച്ചുദിവസം മുമ്പ് സംവിധായകന് ബാലചന്ദ്രകുമാര് ദിലീപിനെതിരെ വെളിപ്പെടുത്തല് നടത്തിയിരുന്നു. കേസ് അന്വേഷിക്കുന്ന ഉദ്യോഗസ്ഥരെ അപായപ്പെടുത്താന് ദിലീപും കൂട്ടരും ഗൂഢാലോചന നടത്തിയെന്ന് ചൂണ്ടിക്കാട്ടി ഇവര്ക്കെതിരെ കേസ് രജിസ്റ്റര് ചെയ്തിരുന്നു. ഇതിനു പിന്നാലെ 33 മണിക്കൂര് ക്രൈംബ്രാഞ്ച് ഇവരെ ചോദ്യം ചെയ്തിരുന്നു. പിന്നാലെ കഴിഞ്ഞദിവസമാണ് ഇവര്ക്ക് മുന്കൂര് ജാമ്യം ലഭിച്ചത് .
2017 ലാണ് കേസിനാസ്പദമായ സംഭവം നടക്കുന്നത് . കേസിലെ ഒന്നാംപ്രതി പള്സര് സുനി ജയിലില് തന്നെയാണ് . നടന് ദിലീപ് 84 ദിവസം ജയില് വാസം അനുഭവിച്ച ശേഷം പുറത്തിറങ്ങുകയും ചെയ്തു.