‘പൊലീസിനോട് പറഞ്ഞാല്‍ ദിലീപ് നമ്മളെയും കൊന്നാലോ?’; ബാലചന്ദ്രകുമാറിനോട് ഭാര്യ ചോദിച്ചത് കോടതിയൽ വായിച്ച് ഡിജിപി

അന്വേഷണ ഉദ്യോഗസ്ഥർക്കെതിരെ വധഗൂഢാലോചന നടത്തിയത് പൊലീസിനോട് പറഞ്ഞാല്‍ ദിലീപ് നമ്മളെയും കൊന്നാലോ എന്ന് ബാലചന്ദ്രകുമാറിനോട് ഭാര്യ ചോദിച്ചെന്ന് പ്രൊസിക്യൂഷന്‍ കോടതിയില്‍. ഗൂഢാലോചന നടക്കുന്ന സമയത്ത് തന്നെ എല്ലാ കാര്യങ്ങളും ബാലചന്ദ്രകുമാര്‍ ഭാര്യയോട് പറഞ്ഞിരുന്നു. ദിലീപ് ഗൂഢാലോചന നടത്തിയതിന് നേര്‍സാക്ഷിയായ ആളാണ് ബാലചചന്ദ്രകുമാറെന്നും ഡിജിപി കോടതിയില്‍ ചൂണ്ടിക്കാട്ടി.

പ്രതി ദിലീപിന്റെ പശ്ചാത്തലം പരിശോധിക്കണം. സഹപ്രവര്‍ത്തകയെ ലൈംഗികമായി പീഡിപ്പിക്കാൻ ക്വട്ടേഷന്‍ കൊടുത്തയാളാണ് പ്രതി. ദിലീപിനെതിരായ ആരോപണങ്ങള്‍ ഗുരുതരമാണ്. ബാലചന്ദ്രകുമാറിന്റെ വെളിപ്പെടുത്തലിന് പിന്നാലെ ദിലീപ് ഉള്‍പ്പെടെ പ്രതികള്‍ കൂട്ടത്തോടെ ഫോണ്‍ മാറ്റിയത് എന്തിനെന്നും പ്രോസിക്യൂഷൻ ചോദിച്ചു. ഫോണിന്റെ ലോക്കിംഗ് പാറ്റേണ്‍ മജിസ്ട്രേറ്റിന് നല്‍കാന്‍ വിസമ്മതിക്കുകയായിരുന്നു ദിലീപ് ഉള്‍പ്പെടെ പ്രതികള്‍. അന്വേഷണം വൈകിപ്പിക്കാനുള്ള നീക്കമായിരുന്നു ഇത്. ഓരോ നിമിഷവും അന്വേഷണത്തില്‍ നിര്‍ണായകമാണെന്നിരിക്കെയാണ് ദിലീപും കൂട്ടാളികളും ഇത്തരത്തില്‍ പ്രവര്‍ത്തിച്ചതെന്നും പ്രോസിക്യൂഷൻ ചൂണ്ടിക്കാട്ടി.

ഗൂഢാലോചന നടത്തിയെന്ന് ആരോപണമുള്ള ഫോണ്‍ കൈമാറാന്‍ പോലും ദിലീപും മറ്റ് പ്രതികളും ആദ്യം തയ്യാറായില്ല. ഏഴ് ഫോണുകളുണ്ടെന്ന് അന്വേഷണ സംഘം കണ്ടെത്തിയിരുന്നു. ആറെണ്ണമേ ഉള്ളൂ എന്നാണ് പ്രതികളുടെ വാദം. അവരുടെ വാദം തെറ്റാണെന്ന് കോടതിക്കും ബോധ്യപ്പെട്ടതാണ്. അന്വേഷണത്തോട് ഒരു തരത്തിലും സഹകരിക്കാത്ത നിലപാടാണ് ദിലീപ് ഉള്‍പ്പെടെ പ്രതികളുടേതെന്നും പ്രോസിക്യൂഷൻ വിശദീകരിച്ചു.