പഞ്ചാബ് ചണ്ഡിഗഢ് സര്വകലാശാലയിലെ ഒളിക്യാമറ വിവാദത്തില് വിശദമായ അന്വേഷണത്തിന് പൊലീസ്. സംഭവത്തില് അറസ്റ്റിലായ വിദ്യാര്ത്ഥിനിയുടെ മൊബൈല് ഫോണ് ശാസ്ത്രീയ പരിശോധനയ്ക്കയക്കാനാണ് പൊലീസിന്റെ തീരുമാനം. മറ്റു വിദ്യാര്ത്ഥിനികളുടെ ശുചിമുറി ദൃശ്യങ്ങള് പകര്ത്തിയെന്ന് ആരോപണമുണ്ടായിരുന്നു. ഇതിന്റെ സത്യാവസ്ഥ കണ്ടെത്താന് ശാസ്ത്രീയ പരിശോധന ഗുണംചെയ്യുമെന്നാണ് പൊലീസ് കരുതുന്നത്.
നിലവില് മറ്റുള്ളവരുടെ ദൃശ്യങ്ങള് പകര്ത്തിയിട്ടില്ല എന്നാണ് പൊലീസും സര്വകലാശാലാ അധികൃതരും പറയുന്നത്. അതേസമയം വിദ്യാര്ത്ഥി പ്രതിഷേധം കണക്കിലെടുത്ത് ഇന്നും നാളെയും സര്വകലാശാല അവധി പ്രഖ്യാപിച്ചു. ശുചിമുറി ദൃശ്യങ്ങള് പ്രചരിപ്പിച്ചെന്നാരോപിച്ച് ശനിയാഴ്ച രാത്രി സര്വകലാശാലയില് വിദ്യാര്ത്ഥിനികള് ആത്മഹത്യാ ഭീഷണി മുഴക്കിയിരുന്നു.
ചണ്ഡിഗഢ് സര്വകലാശാലയിലെ വനിതാ ഹോസ്റ്റിലിലെ ദൃശ്യങ്ങളാണ് സമൂഹ്യമാധ്യമങ്ങളില് ചോര്ന്നത്. ഹോസ്റ്റിലെ ഒരു പെണ്കുട്ടിയാണ് കൂടെ താമസിക്കുന്ന കുട്ടിയുടെ സ്വകാര്യ വിഡിയോകള് പകര്ത്തി പ്രചരിപ്പിച്ചത്. ശുചിമുറിയിലെ ദൃശ്യങ്ങളടക്കം ചോര്ന്നിട്ടുണ്ട്. എന്നാല് പ്രതിഷേധത്തിനെത്തിയ വിദ്യാര്ഥികള് കാമ്പസില് ആത്മഹത്യാഭീഷണി മുഴക്കിയതായുള്ള റിപ്പോര്ട്ടുകള് പൊലീസും കോളജ് അധികൃതരും തള്ളിക്കളഞ്ഞു. ഇത്തരത്തില് ആത്മഹത്യ ശ്രമങ്ങള് റിപ്പോര്ട്ട് ചെയ്തിട്ടില്ലെന്ന് മൊഹാലി പൊലീസ് മേധാവി വിവേക് സോണി പറഞ്ഞതായി വാര്ത്താ ഏജന്സിയായ എ.എന്.ഐ റിപ്പോര്ട്ട് ചെയ്തു.