ഗൂഗിള് മാപ്പ് നോക്കിയുള്ള യാത്രയില് പലര്ക്കും അബദ്ധം പിണയാറുണ്ട്. മലപ്പുറത്ത് ഒരു കുടുംബത്തിന് അത്തരത്തില് സംഭവിച്ച ഒരു അബദ്ധമാണ് ഇപ്പോള് വാര്ത്തയായിരിക്കുന്നത്. പൊന്മുണ്ടത്ത് നിന്ന് പുതുപറമ്പിലേക്കായിരുന്നു തിരൂര് സ്വദേശിയുടെ കുടുംബസമേതമുള്ള യാത്ര. എട്ട് കിലോമീറ്റര് മാത്രമുള്ള ദൂരം ഗൂഗിള് മാപ്പ് ഉപയോഗിച്ചായിരുന്നു സഞ്ചാരം. യാത്ര എത്തിപ്പെട്ടതാകട്ടെ പാലച്ചിറയിലെ കുത്തനെയുള്ള ഇറക്കത്തില്. പിന്നെ വഴി അവസാനിച്ചു. തൊട്ടുമുന്നിലുള്ളത് വെള്ളക്കെട്ട് നിറഞ്ഞ പാടം.
രാത്രി സമയം ആള് പാര്പ്പില്ലാത്ത സ്ഥലത്ത് നിന്ന് ഭാഗ്യം കൊണ്ടാണ് ഇവര് രക്ഷപ്പെട്ടത്. തുടര്ന്ന് കാര് ഉപേക്ഷിച്ച് റോഡിലേക്ക് തിരിച്ച് നടന്നു. മറ്റൊരു വാഹനം വിളിച്ചുവരുത്തിയാണ് ഇവര് യാത്ര തുടര്ന്നത്. പിറ്റേന്ന് രാവിലെ പ്രദേശവാസികള് ചേര്ന്ന് പ്രയാസപ്പെട്ടാണ് കാര് റോഡിലേക്ക് എത്തിച്ചത്.
സമാന സംഭവങ്ങള് നേരത്തേയും റിപ്പോര്ട്ട് ചെയ്തിട്ടുണ്ട്. ടൊയോട്ട ഫോര്ച്യൂണറില് കേരളം സന്ദര്ശിക്കാനെത്തിയ ഒരു കൂട്ടം വിനോദസഞ്ചാരികള് തോട്ടിലേക്ക് പതിച്ചിരുന്നു. കഴിഞ്ഞ മെയില് കുറുപ്പന്തറയിലാണ് സംഭവം നടന്നത്. കുറപ്പന്തറ കല്ലറ റോഡില് കുറുപ്പന്തറ കടവ് തോട്ടിലേക്കാണ് കാര് വീണത്. കര്ണാടകയില് നിന്ന് കേരളത്തിലേക്ക് എത്തിയതായിരുന്നു വിനോദസഞ്ചാരികളുടെ കുടുംബം. മൂന്നാറില് നിന്ന് ആലപ്പുഴയിലേക്ക് പോകുകയായിരുന്നു ഇവര്. ലക്ഷ്യസ്ഥാനത്ത് എത്താനുള്ള വഴികള്ക്കായി അവര് ഗൂഗിള് മാപ്പ് പിന്തുടരുകയായിരുന്നു. വാഹനം കുറുപ്പന്തറ കടവില് എത്തിയപ്പോള് നേരെ പോകാന് മാപ്പ് നിര്ദേശിച്ചു. എന്നാല്, ഡ്രൈവര് നിര്ദേശം പാലിച്ചതോടെ കാര് തോട്ടിലേക്ക് ഇറങ്ങുകയായിരുന്നു.