ലോക ഒന്നാം നമ്പര് ടെന്നീസ് താരം നൊവാക് ജോക്കോവിച്ചിനെ ഓസ്ട്രേലിയ നാടുകടത്തി. വിസ റദ്ദാക്കിയ ഓസ്ട്രേലിയന് ഭരണകൂടത്തിന്റെ നടപടി ചോദ്യം ചെയ്ത് ജോക്കോവിച്ച് നല്കിയ അപ്പീല് കോടതി തള്ളിയതോടെയാണിത്. മൂന്ന് വര്ഷത്തേക്ക് താരത്തിന് ഓസ്ട്രേലിയയില് പ്രവേശിക്കാനാകില്ല. ഓസ്ട്രേലിയയില് നിന്ന് തിരിച്ച താരം ദുബായിലെത്തി. ഇവിടെ നിന്ന് താരം സ്വന്തം നാടായ സെര്ബിയയിലേക്ക് തിരിക്കും.
ഓസ്ട്രേലിയന് ഓപ്പണില് മത്സരിക്കാന് ഈ മാസം അഞ്ചിന് മെല്ബണിലെത്തിയ ജോക്കോവിച്ചിനെ വിമാനത്താവളത്തില് പിടികൂടി വിസ റദ്ദാക്കിയിരുന്നു. കൊവിഡിനെതിരായ വാക്സിന് സ്വീകരിക്കാതെയാണ് ജോക്കോവിച്ച് എത്തിയത്. വാക്സിനേഷനില് ഇളവുനേടിയതിന്റെ വ്യക്തമായ രേഖകളും ഹാജരാക്കാനായില്ല. ഇതിനെതിരെ കോടതിയെ സമീപിച്ച ജോക്കോ അനുകൂലവിധി സമ്പാദിച്ചു. വിസ പുനഃസ്ഥാപിച്ചുകിട്ടി. പിന്നാലെ മോചിതനായ ജോക്കോ പരിശീലനവും തുടങ്ങി.
എന്നാല്, പ്രത്യേകാധികാരം ഉപയോഗിച്ച് ഓസ്ട്രേലിയന് കുടിയേറ്റമന്ത്രി വിസ വീണ്ടും റദ്ദാക്കുകയായിരുന്നു. വാക്സിനെടുക്കാത്ത ജോക്കോയെ പൊതുസമൂഹത്തിന് ഭീഷണിയായും പ്രഖ്യാപിച്ചു. കൊവിഡ് വാക്സിന് എടുക്കാതെ ഓസ്ട്രേലിയയില് പ്രവേശിച്ചതിനാലാണ് ജോക്കോവിച്ചിനെതിരെ നടപടിയെടുത്തതെന്നും പൊതുതാത്പര്യം കണക്കിലെടുത്താണ് വിസ റദ്ദാക്കാനുള്ള തീരുമാനമെടുത്തതെന്നും കുടിയേറ്റ മന്ത്രി അലെക്സ് ഹോക് വ്യക്തമാക്കി. ഇതിനെതിരേ താരം വീണ്ടും കോടതിയെ സമീപിക്കുകയായിരുന്നു. എന്നാല്, മൂന്നംഗ ഫെഡറല് കോടതി ജോക്കോയുടെ അപ്പീല് തള്ളി. ഈ അന്തിമവിധിക്കെതിരെ വീണ്ടും കോടതിയെ സമീപിക്കാന് ജോക്കോയ്ക്ക് കഴിയില്ലായിരുന്നു. ജോക്കോവിച്ച് പുറത്തായതോടെ ഓസ്ട്രേലിയന് ഓപ്പണിന്റെ മത്സരക്രമവും മാറും. തിങ്കളാഴ്ച അദ്ദേഹത്തിന്റെ ആദ്യമത്സരം നിശ്ചയിച്ചിരുന്നതാണ്.