മനുഷ്യാവകാശ പ്രവര്ത്തക ടീസ്റ്റ സെതല്വാദിന്റെ അറസ്റ്റില് പ്രതികരിച്ച യു.എന് മനുഷ്യാവകാശ കൗണ്സിലിനെതിരെ ഇന്ത്യ. വിഷയത്തില് കൗണ്സില് നടത്തിയ പരാമര്ശങ്ങള് അംഗീക്കാനാവാത്തതാണെന്നും ഇന്ത്യയുടെ നിയമ വ്യവസ്ഥയില് ഇടപെടരുതെന്നും അധികൃതര് ചൂണ്ടിക്കാട്ടി.
ടീസ്റ്റ സെതല്വാദിനെയും മുഹമ്മദ് സുബൈറിനെയും അറസ്റ്റ് ചെയ്തതിനെതിരെ യു.എന് ട്വിറ്ററില് പ്രതികരിച്ചിരുന്നു. മനുഷ്യാവകാശ ലംഘനങ്ങള്ക്ക് ഇന്ത്യ ഉത്തരം പറയേണ്ടിവരുമെന്നായിരുന്നു യു.എന് മനുഷ്യാവകാശ കൗണ്സില് പ്രതികരിച്ചത്. ടീസ്റ്റയെ ഉടന് വിട്ടയക്കണമെന്നും വാര്ത്തയുടെ പേരില് മാധ്യമപ്രവര്ത്തകരെ അറസ്റ്റ് ചെയ്യരുതെന്നും യു.എന് സെക്രട്ടറി ജനറല് അന്റോണിയോ ഗുട്ടറസ് ആവശ്യപ്പെട്ടു. ഇതിനെതിരെയാണ് ഇന്ത്യയുടെ പ്രതികരണം.
2002 ലെ ഗുജറാത്ത് കലാപവുമായി ബന്ധപ്പെട്ട് വ്യാജ രേഖ ചമച്ചുവെന്ന് ആരോപിച്ചാണ് ഇരകള്ക്കായി പ്രവര്ത്തിച്ച ടീസ്റ്റ സെതല്വാദിനെ ഗുജറാത്ത് തീവ്രവാദ വിരുദ്ധ സംഘം അറസ്റ്റ് ചെയ്തത്. സുബൈറിനെ വര്ഷങ്ങള്ക്ക് മുമ്പുള്ള ട്വീറ്റിന്റെ പേരിലുമാണ് അറസ്റ്റ് ചെയ്തത്. ഒരു സിനിമയില് നിന്നുള്ള ദൃശ്യം പങ്കുവച്ചതിന് മതവികാരം വൃണപ്പെടുത്തിയെന്ന് കാണിച്ചായിരുന്നു അറസ്റ്റ്. ഇതിനെതിരെയാണ് യു.എന് സെക്രട്ടറി ജനറല് പ്രതികരിച്ചത്.