സോഷ്യല് മീഡിയ താരം കിലി പോളിന് നേരെ അജ്ഞാതരുടെ ആക്രമണം. വടിയും കത്തിയും ഉപയോഗിച്ചാണ് അക്രമികള് കിലിയെ മര്ദിച്ചത്. അക്രമത്തെ ചെറുത്ത താരം സംഭവസ്ഥലത്തുനിന്ന് രക്ഷപ്പെടുകയായിരുന്നു. കിലി തന്നെയാണ് ഇന്സ്റ്റഗ്രാം പേജിലൂടെ ആക്രമണത്തെക്കുറിച്ച് വെളിപ്പെടുത്തിയത്.
അഞ്ചംഗ സംഘമാണ് ആക്രമണം നടത്തിയതെന്ന് കിലി പറഞ്ഞു. തന്റെ വലതുകാലിന്റെ വിരലിന് പരുക്കേറ്റതിനെ തുടര്ന്ന് തുന്നലിട്ടിട്ടുണ്ട്. വടിയും കത്തിയുമുപയോഗിച്ചാണ് അവരെന്നെ ആക്രമിച്ചത്. ഭാഗ്യവശാല് താന് രക്ഷപ്പെടുകയായിരുന്നു. ദൈവത്തിന് നന്ദി, എല്ലാവരും തനിക്കു വേണ്ടി പ്രാര്ഥിക്കണമെന്നും കിലി ആവശ്യപ്പെട്ടു.
ഇന്ത്യന് സിനിമകളിലെ ഗാനങ്ങളും മറ്റു ഡയലോഗുകളും അനുകരിക്കുന്ന ടാന്സാനിയന് താരത്തിന് സമൂഹമാധ്യമങ്ങളില് നിരവധി ആരാധകരുണ്ട്. ഇതിന്റെ അടിസ്ഥാനത്തില് ഫെബ്രുവരിയില് കിലിയെ ടാന്സാനിയയിലെ ഇന്ത്യന് ഹൈക്കമ്മീഷന് ആദരിച്ചിരുന്നു.