സ്വര്ണക്കളളക്കടത്ത് കേസ് പ്രതി സ്വപ്ന സുരേഷിന്റെ രഹസ്യമൊഴിയുടെ പകര്പ്പാവശ്യപ്പെട്ട് സോളാര് കേസ് പ്രതി സരിത എസ് നായര് നല്കിയ ഹര്ജിയില് ഹൈക്കോടതി അമിക്കസ് ക്യൂറിയെ നിയോഗിച്ചു. രഹസ്യമൊഴി പൊതുരേഖയാണോയെന്ന് സംശയം പ്രകടിപ്പിച്ച കോടതി ഈ നിയമപ്രശ്നത്തില് കോടതിയെ സഹായിക്കുന്നതിനാണ് അമിക്കസ്ക്യൂറിയായി അഡ്വ. ധീരേന്ദ്ര കൃഷ്ണനെ ചുമതലപ്പെടുത്തിയത്.
സ്വപ്നയുടെ രഹസ്യമൊഴിയില് തനിക്കെതിരെ പരാമര്ശമുണ്ടെന്നറിഞ്ഞെന്നും അതിനാല്ത്തന്നെ മൊഴിയുടെ പകര്പ്പ് കിട്ടാന് അവകാശമുണ്ടെന്നുമാണ് സരിതയുടെ വാദം. ഹര്ജി ഈ മാസം 11ന് വീണ്ടും പരിഗണിക്കും.
അതേസമയം, സ്വര്ണക്കടത്ത് കേസിലെ കള്ളപ്പണ ഇടപാടില് സ്വപ്ന സുരേഷിനെ ഇഡി ചോദ്യം ചെയ്യുന്നത് തുടരുകയാണ്. നാലാം തവണയാണ് സ്വപ്ന ഇഡിയ്ക്ക് മുന്നില് ഹാജരായത്. കോടതിയില് നല്കിയ രഹസ്യ മൊഴിയുടെ പകര്പ്പ് ലഭിച്ചതിന് പിന്നാലെയാണ് എന്ഫോഴ്സ്മെന്റ് ഡയറക്ടറേറ്റ് സ്വപ്നയില് നിന്ന് മൊഴിയെടുക്കാന് തുടങ്ങിയത്. ക്ലിഫ് ഹൗസ് കേന്ദ്രീകരിച്ച് മുഖ്യമന്ത്രിയും മകളും ഭാര്യയുമടക്കം രാജ്യ വിരുദ്ധ പ്രവര്ത്തനത്തില് ഏര്പ്പെട്ടെന്നും കോണ്സുല് ജനറല് ക്ലിഫ് ഹൗസിലേക്ക് ബിരിയാണി ചെമ്പില് ലോഹ വസ്തുക്കള് കൊടുത്തയച്ചെന്നതടക്കമുള്ള മൊഴികളാണ് സ്വപ്ന നല്കിയിട്ടുള്ളത്.