ന്യൂഡല്ഹി: ഇന്ത്യന് ക്രിക്കറ്റ് താരം ഋഷഭ് പന്തിന് വാഹനാപകടത്തില് പരുക്ക്. ഉത്തരാഖണ്ഡില്നിന്ന് ഡല്ഹിയിലേക്കുള്ള യാത്രയ്ക്കിടെ താരം സഞ്ചരിച്ചിരുന്ന കാര് ഡിവൈഡറില് ഇടിച്ചു കയറി തീ പിടിക്കുകയായിരുന്നു.
ഉത്തരാഖണ്ഡിലെ ഹമ്മദ്പൂര് ഝാലിന് സമീപം റൂര്ക്കിയിലെ നര്സന് അതിര്ത്തിയില് വെച്ചാണ് ഋഷഭ് സഞ്ചരിച്ച കാര് അപകടത്തില്പ്പെട്ടത്. വെള്ളിയാഴ്ച പുലര്ച്ചെ 5:30 ഓടെയാണ് അപകടത്തില്പ്പെട്ടത്. താരം തന്നെയാണ് അപകടം നടക്കുന്ന സമയത്തു വാഹനമോടിച്ചിരുന്നതെന്നാണു പ്രാഥമികമായ വിവരം.
ഉടന് തന്നെ താരത്തെ ആശുപത്രിയില് പ്രവേശിപ്പിച്ചു. കാറിനു തീപിടിച്ചതിനു പിന്നാലെ ഗ്ലാസ് തകര്ത്താണു താരം പുറത്തിറങ്ങിയത്.അപകടം നടക്കുമ്പോള് പന്തു മാത്രമേ കാറിലുണ്ടായിരുന്നുള്ളൂവെന്ന് ഉത്തരാഖണ്ഡ് പൊലീസ് ഡയറക്ടര് ജനറല് അശോക് കുമാര് പ്രതികരിച്ചു.
താരത്തിന് തലയ്ക്കും കാല്മുട്ടിനും കണങ്കാലിനുമാണു പരുക്കുള്ളത്. കാലില് പൊട്ടലുണ്ട്.പന്തിനെ ദില്ലിയിലെ ആശുപത്രിയിലാണ് പ്രവേശിപ്പിച്ചിരിക്കുന്നത്. താരത്തിന് പ്ലാസ്റ്റിക് സര്ജറി നടത്തുമെന്ന് ദൈനിക് ജാഗരണ് റിപ്പോര്ട്ട് ചെയ്യുന്നത്.
അതേസമയം ഋഷഭ് പന്തിന്റെ ചികിത്സയുടെ മുഴുവന് ചെലവും സംസ്ഥാനം വഹിക്കുമെന്ന് ഉത്തരാഖണ്ഡ് മുഖ്യമന്ത്രി പുഷ്കര് സിംഗ് ധാമി പറഞ്ഞു.