താരസംഘടന അമ്മയുടെ പ്രസിഡന്റ് മോഹന്ലാലിന് കെ.ബി ഗണേഷ് കുമാര് എംഎല്എയുടെ കത്ത്. വിവാദ വിഷയങ്ങളില് അക്കമിട്ട ചോദ്യങ്ങളുമായാണ് ഗണേഷിന്റെ കത്ത്. ദിലീപിനോട് നേരത്തെ സ്വീകരിച്ച സമീപനം വ്യക്തമായി മുന്നിലുണ്ടായിട്ടും സമാനമായ കുറ്റം ആരോപിക്കപ്പെട്ട നടന് വിജയ് ബാബുവിനെതിരെ തത്തുല്യമായ നടപടി സ്വീകരിക്കാത്ത് എന്തുകൊണ്ടാണെന്ന് കത്തില് ചോദിക്കുന്നു.
‘അമ്മ’യുടെ അംഗത്വഫീസ് വന്തോതില് വര്ധിപ്പിച്ചതിനെയും ഗണേഷ് കുമാര് വിമര്ശിച്ചു. ‘അമ്മ’ ക്ലബ് ആണെന്ന ഇടവേള ബാബുവിന്റെ പരാമര്ശം ഭാവിയില് നടപ്പിലാക്കാനുള്ള നടപടിക്രമങ്ങളുടെ ഭാഗമാണോ അംഗത്വഫീസ് വര്ധനയെന്ന് സംശയമുണ്ടെന്നും ഗണേഷ് കുമാര് പറഞ്ഞു. ‘അമ്മ’ ക്ലബ് ആണെന്ന് ഇടവേള ബാബു പറഞ്ഞപ്പോള് എന്തുകൊണ്ട് മോഹന്ലാല് മിണ്ടിയില്ലെന്നും കത്തില് ചോദിക്കുന്നു.
അപകടത്തില് പരുക്കേറ്റ് ഏറെക്കാലമായി ചികിത്സയില് കഴിയുന്ന ജഗതി ശ്രീകുമാറിന്റെ പേര് അനവസരത്തില് ഫേസ്ബുക്ക് പോസ്റ്റിലൂടെ ഉന്നയിച്ച് അദ്ദേഹത്തെ അപമാനിക്കാന് ശ്രമിച്ച ഇടവേള ബാബുവിന്റെ പ്രവൃത്തിയെ ‘അമ്മ’ അപലപിക്കുമോ എന്നും ഗണേഷ് കുമാര് ചോദിക്കുന്നു. ഇടവേള ബാബു സംഘടനയുടെ സ്ക്രട്ടറിയായി തുടരാന് യോഗ്യനാണോ എന്ന് പരിശോധിക്കണമെന്നും കത്തില് ആവശ്യപ്പെടുന്നു.