വീട്ടില് പ്രസവിച്ച അതിഥി തൊഴിലാളിയായ യുവതിക്കും കുഞ്ഞിനും രക്ഷകരായി കനില് 108 ആംബുലന്സ് ജീവനക്കാര്. പശ്ചിമബംഗാള് ഷിബ്പൂര് സ്വദേശിയും നെടുങ്കണ്ടം ചെമ്പകകുഴിയില് താമസവുമായ സമീറിന്റെ ഭാര്യ മര്ഫ (20) ആണ് വീട്ടില് ആണ് കുഞ്ഞിന് ജന്മം നല്കിയത്.
വെള്ളിയാഴ്ച പുലര്ച്ചെ രണ്ടരയോടെയാണ് സംഭവം. മര്ഫയ്ക്ക് പ്രസവവേദന അനുഭവപ്പെട്ടതിനെ തുടര്ന്ന് വീട്ടുകാര് കനിവ് 108 ആംബുലന്സിന്റെ സേവനം തേടുകയായിരുന്നു. കണ്ട്രോള് റൂമില് നിന്നുള്ള നിര്ദേശ പ്രകാരം നെടുങ്കണ്ടം താലൂക്ക് ആശുപത്രിയിലെ കനിവ് ആംബുലന്സ് ഡ്രൈവര് മോന്സണ് പി. സണ്ണി, എമര്ജന്സി മെഡിക്കല് ടെക്നീഷ്യന് ഷിന്റു വര്ഗീസ് എന്നിവര് സ്ഥലത്തേക്ക് പുറപ്പെട്ടു. എന്നാല് ഇവര് എത്തുന്നതിന് മുന്പ് മര്ഫ കുഞ്ഞിന് ജന്മം നല്കി.
സ്ഥലത്തെത്തിയ ഉടനെ എമര്ജന്സി മെഡിക്കല് ടെക്നീഷ്യന് ഷിന്റു പൊക്കിള്കൊടി ബന്ധം വേര്പ്പെടുത്തി അമ്മയ്ക്കും കുഞ്ഞിനും പ്രഥമ ശുശ്രൂഷ നല്കി ആംബുലന്സിലേക്ക് മാറ്റി. തുടര്ന്ന് മര്ഫയേയും കുഞ്ഞിനേയും നെടുക്കണ്ടം താലൂക്ക് ആശുപത്രിയില് എത്തിച്ചു. ഇരുവരും സുഖമായി ഇരിക്കുന്നതായി ആശുപത്രി അധികൃതര് അറിയിച്ചു.