തെരുവ് നായയോട് ക്രൂരത; കണ്ണ് അടിച്ചുപൊട്ടിച്ചു; കെ.എസ്.ഇ.ബി ഡ്രൈവര്‍ക്കെതിരെ കേസ്

തെരുവ് നായയുടെ കണ്ണ് അടിച്ചുപൊട്ടിച്ച കെ.എസ്.ഇ.ബിയിലെ ഡ്രൈവര്‍ക്കെതിരെ കേസ്. ഡ്രൈവര്‍ മുരളിക്കെതിരെ തിരുവനന്തപുരം മെഡിക്കല്‍ കോളജ് പൊലീസാണ് കേസെടുത്തത്. ചൊവ്വാഴ്ച രാത്രി വൈദ്യുതി ഭവനിലാണ് സംഭവം. പീപ്പിള്‍ ഫോര്‍ അനിമല്‍സിന്റെ പരാതിയിലാണ് കേസെടുത്തിരിക്കുന്നത്.

വര്‍ഷങ്ങളായി കരാര്‍ അടിസ്ഥാനത്തില്‍ കാര്‍ ഡ്രൈവറായി ജോലി ചെയ്യുന്ന മുരളി ഇരുമ്പ് വടി കൊണ്ടു നായയെ തല്ലുകയായിരുന്നെന്നാണ് പരാതിയില്‍ പറയുന്നത്. കണ്ടുനിന്നവരെല്ലാം അടിക്കരുതെന്ന് പറഞ്ഞിട്ടും അയാള്‍ മര്‍ദനം തുടരുകയായിരുന്നു. ഇതിന്റെ ദൃശ്യം സിസിടിവിയില്‍ പതിഞ്ഞിട്ടുണ്ട്. കാറുകളുടെ ബമ്പര്‍ കടിക്കുന്നതുകൊണ്ടാണ് മര്‍ദിച്ചതെന്നായിരുന്നു മുരളിയുടെ മൊഴി.

പീപ്പിള്‍ ഫോര്‍ അനിമല്‍സിന്റെ സെക്രട്ടറി ലത ഇന്ദിരയും റെസ്‌ക്യൂ ടീം അംഗങ്ങളായ ഉണ്ണിയും അജിത്തുമാണ് ചോരയൊലിപ്പിച്ച് കിടന്ന നായയെ ആശുപത്രിയിലെത്തിച്ചത്. ഇവര്‍ എത്തിയപ്പോള്‍ തല പൊളിഞ്ഞ് അടി കൊണ്ടു ദേഹം മുഴുവന്‍ നീര് വന്ന് വീര്‍ത്തും കാല്‍ ഒടിഞ്ഞു തൂങ്ങിയ നിലയിലായിരുന്നു നായ. ജഗതിയിലുള്ള എ.ആര്‍.എം ആശുപത്രിയിലാണ് നായയെ എത്തിച്ചത്. തലയ്ക്ക് അടിയേറ്റതിനാല്‍ നായയുടെ തലച്ചോറിന് കാര്യമായ ക്ഷതമേറ്റിട്ടുണ്ട്. ഇടതു കണ്ണ് തകര്‍ന്ന നിലയിലാണ്. രക്തം വരുന്നത് നില്‍ക്കാത്തതിനാല്‍ കണ്ണ് ശസ്ത്ര ക്രിയ ചെയ്തു മാറ്റണമെന്നാണ് ഡോക്ടര്‍മാര്‍ അറിയിച്ചിരിക്കുന്നത്. അടിയന്തര ചികിത്സയ്ക്ക് ശേഷം നായയെ പി.എഫ്.ഐ ഷെല്‍ട്ടറിലേക്ക് മാറ്റി.