അവനൊരു ഗേള്‍ഫ്രണ്ട് ഉണ്ട്; റംസാനുമായുള്ള ഋതുവിന്റെ പ്രണയം ചീറ്റിപ്പോയെന്ന് ഡിംപല്‍

വളരെ രസകരമായ ടാസ്‌ക്കുകളുമായാണ് ബിഗ് ബോസ് വീട് മുന്നോട്ട് പോവുന്നത്. തങ്ങളുടെ കഴിവിന്റെ പരമാവധി എല്ലാ മത്സരാര്‍ത്ഥികളും പുറത്തെടുക്കുന്നുണ്ട്. കഴിഞ്ഞ ദിവസം ടാസ്‌കിന്റെ ഭാഗമായി ഒപ്പമുള്ളവര്‍ക്ക് ഗാനം ഡെഡിക്കേറ്റ് ചെയ്യാനുള്ള ഒരു അവസരം ബിഗ്‌ബോസ് നല്‍കിയിരുന്നു.
ഇതില്‍ പല മത്സരാര്‍ത്ഥികളും പലരെയും ക്ഷണിക്കുകയുണ്ടായി. മത്സരാര്‍ത്ഥികളുടെ സ്വഭാവം വെച്ചും മറ്റു സവിശേഷത വെച്ചുമെല്ലാം ആണ് ആളുകളെ തിരഞ്ഞെടുക്കുന്നത്.

ബിഗ് ബോസ് ഒരുക്കിയ ബൗളില്‍ നിന്നും കിട്ടുന്ന ഗാനം ഒരാള്‍ക്ക് വേണ്ടി സമര്‍പ്പിക്കണം. എന്തുകൊണ്ടാണ് ഗാനം സമര്‍പ്പിക്കുന്നതെന്നും പറയണം, ഇതായിരുന്നു ടാസ്‌ക്. ഇതില്‍ ഡിംപലിന് കിട്ടിയത് തേച്ചില്ലെ പെണ്ണേ തേച്ചില്ലെ…എന്ന ഗാനം ആയിരുന്നു ഇത് ഋതുവിന് വേണ്ടിയാണ് ഡിംപല്‍ സമര്‍പ്പിച്ചത്. ഇതിന് കാരണമായി ഡിംപല്‍ പറഞ്ഞത്, റംസാനുമായുള്ള പ്രണയം ചീറ്റിപ്പോയി എന്നതാണ്.

എന്നാല്‍ തനിക്ക് റംസാനോട് പ്രണയം ഇല്ലെന്നും തങ്ങള്‍ നല്ല സുഹൃത്തുക്കളാണെന്നും ഋതു പറയുകയുണ്ടായി. തമാശ പോലെയാണ് വേദിയില്‍ വെച്ച് ഋതു ഇത് പറഞ്ഞത്, എന്നാല്‍ ടാസ്‌ക് കഴിഞ്ഞതോടെ ഇതേ ചിന്തയില്‍ ആയിരുന്നു ഋതു . ഈ കാര്യത്തെക്കുറിച്ച് ഋതു റംസാന്റെ അടുത്ത് പറയുകയും ഉണ്ടായി.

‘ഞങ്ങള്‍ നല്ല സുഹൃത്തുക്കള്‍ ആണ്. അത് ഞങ്ങള്‍ക്ക് രണ്ടാള്‍ക്കും അറിയാം. പുറത്തുള്ളവര്‍ക്കും അറിയാം. എന്നിട്ടും ഈ സംഭവം നെഗറ്റീവ് ആയിരിക്കുകയാണ്. ഇപ്പോള്‍ നോക്കിയേ അതിന്റെ പേരില്‍ എന്തോരം പാട്ടുകളാണ്. അവനൊരു ഗേള്‍ഫ്രണ്ട് ഉണ്ട്. ഇനി ഇതൊക്കെ കണ്ടിട്ട് അവര്‍ക്കിത് പ്രശ്‌നം ആകുമോ’, എന്നാണ് മണിക്കുട്ടനോട് ഋതു സംസാരിക്കുന്നത്.

അതേസമയം ഋതുവും റംസാനും പ്രണയത്തില്‍ ആണെന്നുള്ള വാര്‍ത്ത സോഷ്യല്‍ മീഡിയയില്‍ എത്തിയിരുന്നു. എപ്പോഴും ഒന്നിച്ചുള്ള നടത്തവും ചില സംസാരങ്ങളുമാണ് ഇങ്ങനെ ഒരു സംശയം ഉണ്ടാക്കിയത്. ഇതിനിടെ ഋതു റംസാന് ലെറ്റര്‍ കൊടുത്തത് ശ്രദ്ധിക്കപ്പെട്ടിരുന്നു.