മന്ത്രി മുഹമ്മദ് റിയാസിന്റെ വാർത്താ സമ്മേളനത്തിൽ അപരിചിതൻ കയറിവന്നത് വലിയ വിവാദമായിരിക്കുകയാണ്.മുറിയിൽ കയറിവന്ന അപരിചിതൻ നാടകീയ രംഗങ്ങൾക്കിടയാക്കിയിരുന്നു. ഇയാൾ ശല്യം ചെയ്തു തുടങ്ങിയതോടെ ആരാണെന്ന് നോക്കണേയെന്ന് മന്ത്രി മാധ്യമപ്രവർത്തകരോട് അപേക്ഷിച്ചു. നിങ്ങൾ മാധ്യമപ്രവർത്തകനാണോയെന്ന് അപരിചിതനോട് മന്ത്രി നേരിട്ട് ചോദിക്കുകയും ചെയ്തു. “ഓരോരുത്തർ കയറി വന്നാൽ അതിനും ഞാൻ മറുപടി പറയേണ്ടി വരുമെന്ന് അദ്ദേഹം തമാശരൂപേണ പറഞ്ഞു.
ആളെ സ്നേഹത്തോടെ പുറത്തേക്ക് കൊണ്ടുപോകണമെന്ന് മാധ്യമപ്രവർത്തകരോട് മന്ത്രി ആവശ്യപ്പെട്ടു. ഇല്ലെങ്കില് കൈകാര്യം ചെയ്തു എന്ന് വരും. ‘നിങ്ങൾ ഇടപെടേണ്ട’ എന്ന് മന്ത്രി തനിക്കൊപ്പം വന്നവരോട് നിർദ്ദേശിക്കുകയും ചെയ്തു. മാധ്യമപ്രവർത്തകർ ആളെ അനുനയിപ്പിക്കാൻ ശ്രമിച്ചെങ്കിലും വഴങ്ങാതെ കസേരയിൽ ഇരിപ്പ് തുടർന്നു. പിടിച്ച് നീക്കാൻ മാധ്യമപ്രവർത്തകർ ശ്രമിച്ചപ്പോൾ നിങ്ങളങ്ങനെ ഭീഷണിപ്പെടുത്തുകയൊന്നും വേണ്ടെന്ന് തട്ടിക്കയറി.അപരിചിതനെ ഹാളിൽ നിന്ന് നീക്കം ചെയ്തപ്പോളാണ് മന്ത്രി കനഗോലുവിന്റെ പേര് എടുത്തിട്ടത്. “ഞാനിത് വളരെ ശ്രദ്ധിച്ചാണ് കൈകാര്യം ചെയ്യുന്നത്. കനഗോലു ഒക്കെയാണ് തെരഞ്ഞെടുപ്പ് പ്രചാരണം നടത്തുന്നത്. ആരെയൊക്കെ എങ്ങനെയൊക്കെ വിടുമെന്ന് പറയാൻ പറ്റില്ല. അതുകൊണ്ട് വളരെ ശ്രദ്ധിക്കണം. അയാളോട് പോകാൻ പറയാൻ അറിയാഞ്ഞിട്ടല്ല. കനഗോലുവിന്റെ ഒരു കാലമാണല്ലോ ഇത്,” അദ്ദേഹം പറഞ്ഞു.