ജപ്തി നടപടി നേരിട്ട കുടുംബത്തിലെ കുട്ടികളെ പൂട്ട് തകര്ത്ത് വീടിനുള്ളില് പ്രവേശിപ്പിച്ച സംഭവത്തില് മാത്യു കുഴല്നാടന് എംഎല്എയ്ക്കെതിരെ നടപടിക്കൊരുങ്ങി അര്ബന് ബാങ്ക്. ജപ്തി ചെയ്ത ബാങ്ക് വീട് കുത്തിത്തുറന്നത് കോടതി അലക്ഷ്യമാണെന്നാണ് ബാങ്ക് പറയുന്നത്.
എം.എല്.എക്കെതിരായ എതിരെ നടപടി ചര്ച്ച ചെയ്യാന് ഈ മാസം 16 ന് യോഗം വിളിച്ചിട്ടുണ്ട്.
രണ്ടു ദിവസം മുമ്പായിരുന്നു ഹൃദ്രോഗിയായ ഗൃഹനാഥന് ആശുപത്രിയിലായിരിക്കെ ബാങ്ക് ഉദ്യോഗസ്ഥര് വീട് ജപ്തി ചെയ്തത്. ഈ സമയം വീട്ടില് പ്രായപൂര്ത്തിയാകാത്ത കുട്ടികള് മാത്രമായിരുന്നു ഉണ്ടായിരുന്നത്. നാട്ടുകാര് വിവരമറിയിച്ചതിനെ തുടര്ന്ന് മാത്യു കുഴല്നാടന് എംഎല്എ സ്ഥലത്തെത്തുകയും വീടിന്റെ പൂട്ട് തകര്ത്ത് കുട്ടികളെ ഉള്ളില് പ്രവേശിപ്പിക്കുകയുമായിരുന്നു.
മൂവാറ്റുപുഴ താലൂക്കിലെ പായിപ്ര പഞ്ചായത്തില് അജേഷിന്റെ വീടാണ് ബാങ്ക് ജപ്തി ചെയ്തത്. 1 ലക്ഷം രൂപ അര്ബന് ബാങ്കില് നിന്നും അജേഷ് ലോണ് എടുത്തിരുന്നു. പിന്നീട് അസുഖം ബാധിച്ചതോടെ തിരിച്ചടവ് മുടങ്ങി. പലിശയടക്കം 1,40,000 തിരിച്ചടക്കാത്തതിനെ തുടര്ന്നാണ് ബാങ്ക് ജപ്തി നടപടികളിലേക്ക് കടന്നത്.