കരളിനും കൈഞരമ്പിനും ഗുരുതര പരുക്ക്; അക്രമിയുടെ കുത്തേറ്റ സല്‍മാന്‍ റുഷ്ദി വെന്റിലേറ്ററില്‍

അക്രമിയുടെ കുത്തേറ്റ എഴുത്തുകാരന്‍ സല്‍മാന്‍ റുഷ്ദി ഗുരുതരാവസ്ഥയില്‍. കഴുത്തിലും വയറിലുമാണ് സല്‍മാന്‍ റുഷ്ദിക്ക് കുത്തേറ്റത്. കരളിനും കൈഞരമ്പിനും ഗുരുതര പരുക്കുണ്ട്. നിലവില്‍ വെന്റിലേറ്ററിലാണ് അദ്ദേഹം കഴിയുന്നത്.

യു.എസ് സമയം വെള്ളിയാഴ്ച രാവിലെയാണ് റുഷ്ദിക്ക് നേരെ ആക്രമണം നടന്നത്. ന്യൂയോര്‍ക്കിലെ ഷുറ്റോക്വാ ഇന്‍സ്റ്റിറ്റിയൂഷനില്‍ പ്രഭാഷണത്തിനെത്തിയതായിരുന്നു അദ്ദേഹം. പരിപാടി തുടങ്ങുന്നതിന് മുന്‍പ് അവതാരകന്‍ അദ്ദേഹത്തെ പരിചയപ്പെടുത്തുന്നതിനിടെ അക്രമി സ്റ്റേജിലേക്ക് കുതിച്ചെത്തി നിരവധി തവണ കത്തികൊണ്ട് കുത്തുകയായിരുന്നു. ഹാദി മതാര്‍ എന്നു പേരുള്ള 24കാരനാണ് അക്രമി. ഇയാളെ സ്ഥലത്തുനിന്ന് പൊലീസ് കസ്റ്റഡിയിലെടുത്തിരുന്നു. ആക്രമണത്തിന് പിന്നിലെ കാരണം വ്യക്തമായിട്ടില്ല.

ആറോ എട്ടോ തവണ റുഷ്ദിക്ക് കുത്തേറ്റിട്ടുണ്ടെന്നാണ് സംഭവത്തിന് ദൃക്സാക്ഷിയായ സ്റ്റേസി ഷോള്‍സര്‍ അസോഷ്യേറ്റഡ് പ്രസിനോട് വെളിപ്പെടുത്തിയത്. ആര്‍ക്കും എന്താണ് ചെയ്യേണ്ടതെന്ന് അറിയാത്ത അവസ്ഥയായിരുന്നു. എങ്ങനെ പ്രതികരിക്കുമെന്ന് അറിയാത്ത സ്ഥിതിയായിരുന്നു. കുത്തേറ്റു വീണതിനു പിന്നാലെ പത്തോളം പേരാണ് സ്റ്റേജിലേക്ക് ഇരച്ചെത്തിയതെന്നും അദ്ദേഹം കൂട്ടിച്ചേര്‍ത്തു.

‘ദ് സാത്താനിക് വേഴ്‌സസ്’ എന്ന പുസ്തകത്തിന്റെ പേരില്‍ 1980കളുടെ അവസാനത്തില്‍ റുഷ്ദിക്കു വധഭീഷണിയുണ്ടായിരുന്നു. റുഷ്ദിയെ കൊല്ലുന്നവര്‍ക്ക് 1989ല്‍ ഇറാന്റെ പരമോന്നത നേതാവായിരുന്ന ആയത്തുല്ല ഖുമൈനി പാരിതോഷികം പ്രഖ്യാപിച്ചിരുന്നു. മൂന്നു മില്യന്‍ യു.എസ് ഡോളറാണ് പാരിതോഷികമായി പ്രഖ്യാപിച്ചത്.