ഒരു കാനഡ ട്രിപ്പിലാണ് ഞങ്ങള്‍ ഇഷ്ടം പറഞ്ഞത്, മോള്‍ പോയെങ്കിലും ഒരു മോനെ കിട്ടി എന്നാണ് സുബിയുടെ മരണ സമയത്ത് അമ്മ പറഞ്ഞത്; രാഹുല്‍ പറയുന്നു

41 വയസ്സില്‍ ഈ ലോകത്തോട് വിട പറഞ്ഞിരിക്കുകയാണ് നടി സുബി സുരേഷ്. സുബിയുടെ മരണശേഷമാണ് നടിയുടെ ജീവിത കഥയെല്ലാം പലരും അറിയുന്നത്. ഇതോടെ ഒരു സമയത്ത് സുബിയെ വിമര്‍ശിച്ചവര്‍ പോലും അഭിനന്ദിച്ച് എത്തി. തന്റെ ജീവിതം എന്നത് ഒറ്റയ്ക്ക് നേടിയെടുത്തതാണ് സുബി സുരേഷ്. സ്വന്തമായൊരു വീട് , സഹോദരന് വീട് ഇതെല്ലാം തന്റെ അധ്വാനത്തില്‍ നിന്നാണ് സുബി സുരേഷ് ഉണ്ടാക്കിയെടുത്തത്. ഇതൊക്കെ ഓര്‍ക്കുമ്പോള്‍ തനിക്ക് അഭിമാനം മാത്രമാണെന്ന് സുബി വേദിയില്‍ വച്ച് പറഞ്ഞിരുന്നു.

എന്നാല്‍ ജീവിതത്തിലെ മറ്റൊരാഗ്രഹം നടക്കാനിരിക്കവെയാണ് സുബി സുരേഷ് യാത്രയായത്. തന്റെ ഭാവി വരന്‍ രാഹുലിനെ സുബി സുരേഷ് പരിചയപ്പെടുത്തിയിരുന്നു. ഫെബ്രുവരിയില്‍ വിവാഹം ഉണ്ടാകുമെന്നും ചെറിയൊരു സൂചന ഇവര്‍ നല്‍കി.

ഇവരുടെ വിവാഹം കാണാന്‍ വേണ്ടി ആരാധകര്‍ കാത്തിരിക്കുകയായിരുന്നു, എന്നാല്‍ അറിഞ്ഞത് നടിയുടെ മരണ വാര്‍ത്തയാണ്. താന്‍ വിവാഹം കഴിക്കുകയാണെങ്കില്‍ പ്രണയിച്ചേ വിവാഹം കഴിക്കു എന്ന് നടി പറഞ്ഞിരുന്നു. മാത്രമല്ല തനിക്ക് നേരത്തെ ചില പ്രണയങ്ങള്‍ ഉണ്ടായിരുന്നുവെന്നും എന്നാല്‍ അതൊക്കെ ഒഴിവാക്കേണ്ടി വന്നതിനെക്കുറിച്ച് സംസാരിച്ചിരുന്നു താരം. സുബിയുടെ മരണത്തിന് പിന്നാലെ മാധ്യമങ്ങളോട് പ്രതികരിക്കുകയും ചെയ്തിരുന്നു ഭാവി വരന്‍ രാഹുല്‍.

ഞങ്ങളൊന്നിച്ച് ഒത്തിരി പരിപാടികള്‍ ചെയ്തിട്ടുണ്ടെന്ന് രാഹുല്‍ പറഞ്ഞു. എപ്പോഴും ഒരുമിച്ച് പോവുകയല്ലേ, അതിനിടയിലാണ് ഒന്നിക്കുന്നതിനെക്കുറിച്ച് പറഞ്ഞത്. ഒരു ക്യാനഡ ട്രിപ്പിലാണ് ഞങ്ങള്‍ ഇഷ്ടം പറഞ്ഞത്. സുബി അമ്മയോട് വിളിച്ച് ചോദിച്ചിരുന്നു. എന്തിനാണ് വൈകിപ്പിക്കുന്നതെന്നായിരുന്നു അമ്മ ചോദിച്ചത്. സുബി എന്നെ ഇഷ്ടപ്പെടുന്നതിനെക്കാളും കൂടുതലായി അമ്മയും എന്നെ ഇഷ്ടപ്പെടുന്നുണ്ട്. അവര്‍ അനുവദിക്കുകയാണെങ്കില്‍ ജീവിതകാലം മുഴുവനും അവരെ നോക്കണമെന്നുണ്ട്. മോള്‍ പോയെങ്കിലും ഒരു മോനെ കിട്ടി എന്നാണ് സുബിയുടെ മരണ സമയത്ത് അമ്മ പറഞ്ഞത്.