അട്ടപ്പാടി മധുകൊലക്കേസില് പതിനെട്ടാം സാക്ഷി കാളി മൂപ്പന് കൂറുമാറി. വനം വകുപ്പ് വാച്ചറാണ് കാളി മൂപ്പന്. ഇതോടെ കേസില് മൊഴിമാറ്റിയ സാക്ഷികളുടെ എണ്ണം എട്ടായി. മൊഴിമാറ്റിയ രണ്ടു വനംവാച്ചര്മാരെ നേരത്തെ വനംവകുപ്പ് ജോലിയില് നിന്ന് പിരിച്ച് വിട്ടിരുന്നു. രഹസ്യമൊഴി നല്കിയ പത്തുമുതല് പതിനേഴ് വരെയുള്ള സാക്ഷികളില് പതിമൂന്നാം സാക്ഷി സുരേഷ് മാത്രമാണ് മൊഴിയില് ഉറച്ചു നിന്നത്.
രഹസ്യമൊഴി നല്കിയ പതിനേഴാം സാക്ഷി ജോളിയും രണ്ട് ദിവസം മുമ്പ് കൂറുമാറിയിരുന്നു. മധുവിനെ പ്രതികള് കാട്ടില് നിന്ന് പിടിച്ചു കൊണ്ടുവരുന്നത് കണ്ടെന്ന് മൊഴി നല്കിയ ജോളിയാണ് വിസ്താരത്തിനിടെ കുറുമാറിയത്. പൊലീസ് നിര്ബന്ധത്തിന് വഴങ്ങിയാണ് ആദ്യമൊഴി നല്കിയത് എന്നായിരുന്നു ജോളി തിരുത്തിയത്.
പുതിയ സ്പെഷ്യല് പ്രോസിക്യൂട്ടര് രാജേഷ് എം മേനോന് ചുമതലയേറ്റശേഷം കഴിഞ്ഞ ദിവസമാണ് സാക്ഷി വിസ്താരം പുനരാരംഭിച്ചത്. സി രാജേന്ദ്രന് സ്ഥാനമൊഴിഞ്ഞതിന് പിന്നാലെയായിരുന്നു രാജേഷ് എം മേനോന്റെ നിയമനം. രാജേന്ദ്രനെ നീക്കി പകരം, രാജേഷ് എം.മേനോനെ നിയമിക്കണമെന്ന് മധുവിന്റെ കുടുംബം ആവശ്യപ്പെട്ടിരുന്നു. ഈ ആവശ്യം പരിഗണിച്ചാണ് അഡീ. സ്പെഷ്യല് പ്രോസിക്യൂട്ടര് ആയിരുന്ന രാജേഷ് എം.മേനോനെ സ്പെഷ്യല് പബ്ലിക് പ്രോസിക്യൂട്ടറായി നിയമിച്ചത്.
2018 ഫെബ്രുവരി 22നാണ് ഒരു സംഘം ആളുകള് മധുവിനെ തല്ലിക്കൊല്ലുന്നത്. ജൂണ് 8ന് കേസില് വിചാരണ തുടങ്ങിയതിന് പിന്നാലെ രണ്ട് പ്രധാന സാക്ഷികള് കൂറ് മാറിയിരുന്നു. പ്രോസിക്യൂഷന്റെ വീഴ്ചയാണ് കുറുമാറ്റത്തിന് ഇടയാക്കിയതെന്ന് ആരോപിച്ച് മധുവിന്റെ അമ്മയും സഹോദരിയും രംഗത്തെത്തി. സ്പെഷ്യല് പബ്ലിക് പ്രോസിക്യൂട്ടറെ മാറ്റണമെന്ന് ആവശ്യപ്പെട്ട് വിചാരണ കോടതിയെ സമീപിച്ചെങ്കിലും ഇക്കാര്യത്തില് സര്ക്കാരാണ് തീരുമാനമെടുക്കേണ്ടതെന്ന് കോടതി വ്യക്തമാക്കുകയായിരുന്നു. പ്രോസിക്യൂട്ടറെ മാറ്റുന്നതുവരെ വിചാരണ നിര്ത്തിവയ്ക്കണമെന്ന് കുടുംബം ആവശ്യപ്പെട്ടെങ്കിലും ഹൈക്കോടതിയെ സമീപിക്കാന് വിചാരണ കോടതി നിര്ദേശിക്കുകയായിരുന്നു. ഇതേതുടര്ന്നാണ് മധുവിന്റെ അമ്മ ഹൈക്കോടതിയെ സമീപിച്ച് സ്റ്റേ വാങ്ങിയത്.