യുവതിയെ സ്വയം വിവാഹം കഴിക്കാന്‍ അനുവദിക്കില്ല; ഹിന്ദുക്കളുടെ ജനസംഖ്യ കുറയുമെന്ന് ബിജെപി നേതാവ്

ഗുജറാത്തിലെ വഡോദര സ്വദേശിനിയായ 24കാരി ക്ഷമ ബിന്ദു സ്വയം വിവാഹം കഴിക്കാനൊരുങ്ങുന്നതിനെതിരെ ബിജെപി നേതാവ് സുനിത ശുക്ല. ക്ഷേത്രത്തില്‍വച്ച് വിവാഹം കഴിക്കാനുള്ള ക്ഷമയുടെ ആഗ്രഹം നടക്കില്ലെന്ന് സുനിത ശുക്ല പറഞ്ഞു. അത് ഹിന്ദുത്വത്തിന് എതിരാണ്. ഇത്തരം ആചാരങ്ങള്‍ ഹിന്ദുമതത്തിലില്ലെന്നും ഹിന്ദുക്കളുടെ ജനസംഖ്യ കുറയ്ക്കാനേ ഇതുവഴി സാധിക്കൂ എന്നും ബിജെപി നേതാവ് പറഞ്ഞു.

കഴിഞ്ഞ ദിവസമാണ് വഡോദര സ്വദേശിനി ക്ഷമ ബിന്ദു സ്വയം വിവാഹം കഴിക്കാന്‍ പോകുന്നുവെന്ന കാര്യം പ്രഖ്യാപിച്ചത്. സ്വയം വിവാഹം കഴിക്കുകയെന്നത് നിങ്ങളോട് തന്നെയുള്ള നിരുപാധികമായ സ്‌നേഹത്തിന്റെ തുറന്ന പ്രഖ്യാപനമാണെന്നാണ് ക്ഷമ പറഞ്ഞത്. ആളുകള്‍ എല്ലായ്‌പ്പോഴും അവര്‍ക്ക് ഇഷ്ടം തോന്നുന്നവരെയാണ് വിവാഹം ചെയ്യേണ്ടതെന്നും അവള്‍ക്ക് അവളെ തന്നെയാണ് ഇഷ്ടമെന്നും ക്ഷമ പറഞ്ഞിരുന്നു.

താന്‍ ഒരിക്കലും വിവാഹം കഴിക്കാന്‍ ആഗ്രഹിച്ചിട്ടില്ലെന്നും എന്നാല്‍ വധുവായി അണിഞ്ഞൊരുങ്ങാന്‍ ആഗ്രഹമുണ്ടായിരുന്നെന്നും ക്ഷമ പറഞ്ഞു. ഇതിനാലാണ് സ്വയം വിവാഹചടങ്ങ് സംഘടിപ്പിക്കുന്നതെന്നും അവര്‍ പറഞ്ഞു. ഗോത്രിയിലെ ഒരു ക്ഷേത്രത്തില്‍വച്ച് ജൂണ്‍ 11നാണ് വിവാഹം നടത്താനായിരുന്നു ക്ഷമയുടെ തീരുമാനം.