മധ്യപ്രദേശില് പ്രളയത്തില് കാണാതായ മലയാളി സൈനികന്റെ മൃതദേഹം കണ്ടെത്തി. എറണാകുളം മാമംഗലം സ്വദേശി നിര്മ്മല് ശിവരാജനാണ് മരിച്ചത്. കാര് കണ്ടെത്തിയതിന് സമീപ പ്രദേശത്താണ് മൃതദേഹം കണ്ടെത്തിയത്. മിന്നല് പ്രളയത്തില്പ്പെട്ടതാണെന്നാണ് കരുതുന്നത്.
മൂന്ന് ദിവസം മുമ്പാണ് നിര്മ്മലിനെ കാണാതായത്. മധ്യപ്രദേശിലെ ജബല്പൂരില് നിന്ന് ജോലി സ്ഥലത്തേക്കുള്ള യാത്രക്കിടെ കാണാതാവുകയായിരുന്നു. ജപല്പൂരില് ലെഫ്റ്റനന്റ് ആയി ജോലി ചെയ്യുന്ന ഭാര്യ ഗോപി ചന്ദ്രയെ കണ്ടശേഷം ജോലി സ്ഥലത്തേയ്ക്ക് തിരികെ മടങ്ങുന്നതിനിടെയാണ് നിര്മ്മലിനെ കാണാതായത്.
നര്മ്മദാപുരത്തെ ബച്ച്വാര ഗ്രാമത്തിലായിരുന്നു നിമ്മലിന്റെ ഫോണിന്റെ അവസാന ടവര് ലൊക്കേഷന്. ഇതിന്റെ അടിസ്ഥാനത്തില് പ്രദേശത്ത് നടത്തിയ തെരച്ചില് നിര്മ്മല് സഞ്ചരിച്ച കാര് കണ്ടെത്തിയിരുന്നു. തകര്ന്ന നിലയിലാണ് കാര് കണ്ടെത്തിയത്. തുടര്ന്ന് നടത്തിയ തെരച്ചില് നിര്മ്മലിന്റെ മൃതദേഹവും കണ്ടെത്തുകയായിരുന്നു.
