വീണ്ടും ഒരുമിച്ച് ജീവിക്കാന്‍ തീരുമാനിച്ച ശേഷം കോടതി മുറിയില്‍ ഭാര്യയെ കഴുത്തറുത്ത് കൊന്ന് യുവാവ്

വീണ്ടും ഒരുമിച്ച് ജീവിക്കാന്‍ തീരുമാനിച്ച ശേഷം കോടതി മുറിയില്‍ വച്ച് യുവാവ് ഭാര്യയെ കഴുത്തറുത്ത് കൊലപ്പെടുത്തി. കര്‍ണാടകയിലെ ഹാസന്‍ ജില്ലയിലുള്ള ഹോളനരസിപുര ടൗണ്‍ കോടതിയില്‍ ശനിയാഴ്ചയാണ് സംഭവം നടന്നത്.

ദമ്പതികളുടെ വിവാഹമോചന കേസ് പരിഗണിക്കുന്നതിനിടെയാണ് കൊലപാതകം നടന്നത്. ഭാര്യയെ കൊലപ്പെടുത്തിയ ശേഷം ഇയാള്‍ കുഞ്ഞിനെ ആക്രമിക്കാന്‍ ശ്രമിച്ചെങ്കിലും സമീപത്തുണ്ടായിരുന്നവര്‍ ഇടപെട്ട് കുട്ടിയെ രക്ഷപ്പെടുത്തി. തട്ടേക്കരെ ഗ്രാമത്തില്‍ താമസിക്കുന്ന ചൈത്രയാണ് കൊല്ലപ്പെട്ടത്. ഹോളനരസിപുര താലൂക്കില്‍ നിന്നുള്ള ശിവകുമാറാണ് പ്രതി.

ഏഴു വര്‍ഷം മുമ്പായിരുന്നു ശിവകുമാറിന്റെയും ചൈത്രയുടെയും വിവാഹം. ഒരു മകളും ഇവര്‍ക്കുണ്ട്. ശനിയാഴ്ച നടന്ന ലോക് അദാലത്ത് ദമ്പതികളോട് വിവാഹമോചന ഹര്‍ജികള്‍ പിന്‍വലിച്ച് പ്രശ്നം രമ്യമായി പരിഹരിക്കാന്‍ ആവശ്യപ്പെട്ടിരുന്നു. ഒരു മണിക്കൂറോളം നീണ്ട കൗണ്‍സിലിംഗിന് ശേഷം ഇരുവരും വിവാഹമോചന ഹര്‍ജികള്‍ പിന്‍വലിക്കുകയും കുട്ടിക്ക് വേണ്ടി ഒരുമിച്ച് ജീവിക്കാന്‍ സമ്മതിക്കുകയും ചെയ്തു. എന്നാല്‍, തൊട്ടുപിന്നാലെ കോടതി വളപ്പിലെ ശുചിമുറിയിലേക്ക് ചൈത്ര പോയപ്പോള്‍ ശിവകുമാര്‍ പിന്നാലെ വന്ന് കത്തികൊണ്ട് ആക്രമിക്കുകയും കഴുത്ത് മുറിക്കുകയും ചെയ്യുകയായിരുന്നു.

ഗുരുതരമായി പരുക്കേറ്റ ചൈത്രയെ ഹോളനര്‍സിപുരയില്‍ നിന്ന് ആംബുലന്‍സില്‍ ഹാസന്‍ ജില്ലാ ആശുപത്രിയിലേക്ക് കൊണ്ടുപോയി. ആശുപത്രിയില്‍ എത്തിച്ച് ചികിത്സ നല്‍കിയെങ്കിലും മരണം സംഭവിക്കുകയായിരുന്നു.