വധുവിനെ വേണമെന്നാവശ്യപ്പെട്ട് നഗരത്തിലാകെ പോസ്റ്റര് പതിപ്പിച്ച് യുവാവ്. തമിഴ്നാട്ടിലാണ് സംഭവം. മധുരയിലെ വില്ലുപുരം സ്വദേശിയായ ജഗന് എന്ന യുവാവാണ് വധുവിനെ ആവശ്യപ്പെട്ട് പോസ്റ്റര് പതിച്ചത്. എഞ്ചിനീയറായ ജഗന് 27വയസാണ് പ്രായം. സാധാരണ എല്ലാവരും പിന്തുടരുന്ന രീതികളൊക്കെ നോക്കിയിട്ടും പെണ്ണ് കിട്ടാതെ വന്നതോടെയാണ് യുവാവ് പോസ്റ്റര് പതിക്കാന് നിര്ബന്ധിതനായത്.
പോസ്റ്ററുകളില് ജഗന്റെ ഫോട്ടോയ്ക്കൊപ്പം പേര്, ജാതി, ശമ്പളം, തൊഴില്, വിലാസം, തനിക്കുള്ള ഭൂമി തുടങ്ങിയ വിശദാംശങ്ങളുമുണ്ട്. കഴിഞ്ഞ അഞ്ച് വര്ഷമായി വധുവിനെ തിരഞ്ഞുവരികയാണെന്നും എന്നാല് കണ്ടെത്താനായില്ലെന്നുമാണ് ജഗന് പറയുന്നത്. അങ്ങനെയാണ് പോസ്റ്റര് ഡിസൈന് ചെയ്ത് ഒട്ടിച്ചത്. പാര്ട്ട് ടൈം ഡിസൈനറായി ജോലി നോക്കുന്ന ജഗന് ഇതുപോലെയുള്ള ഒരുപാട് പോസ്റ്ററുകള് ഡിസൈന് ചെയ്യുന്നുണ്ട്. അപ്പോഴാണ് എന്തുകൊണ്ടാണ് തനിക്കായിത്തന്നെ ഇങ്ങനെ ഒരു പോസ്റ്റര് ഡിസൈന് ചെയ്ത് പെണ്ണന്വേഷിച്ച് കൂടാ എന്ന് ചിന്തിക്കുന്നത്.
പോസ്റ്ററും വിചാരിച്ച പോലെ ജഗനെ സഹായിച്ചില്ല. പെണ്കുട്ടികളില് നിന്നോ അവരുടെ രക്ഷിതാക്കളില് നിന്നോ വിളി വരുമെന്നും പ്രതീക്ഷിച്ച് നിന്ന ജഗന് വന്നതെല്ലാം ബ്രോക്കര്മാരില് നിന്നുമുള്ള കോളുകളാണ്. മാത്രമല്ല, ഈ പോസ്റ്ററിന്റെ പേരില് ഓണ്ലൈനില് ആളുകള് ജഗനെ കണക്കിന് കളിയാക്കുകയും ചെയ്തു. എന്നാല്, അതൊന്നും താന് കാര്യമാക്കുന്നില്ല എന്നാണ് ജഗന് പറയുന്നത്. പെണ്ണന്വേഷണം ഇതേ വഴിയില് തുടരുമെന്നും ജഗന് കൂട്ടിച്ചേര്ത്തു.