ജീവിതത്തിൽ ജ്യേഷ്ഠ സഹോദരന്റെ ഭാര്യയാണെങ്കിൽ, വെള്ളിത്തിരയിൽ ജ്യോതിക കാർത്തിയുടെ സ്വന്തം സഹോദരിയാണ്. ജീത്തു ജോസഫ് സംവിധാനം ചെയ്യുന്ന ആദ്യ തമിഴ് ചിത്രത്തിൽ കാർത്തിയുടെ മൂത്ത സഹോദരിയുടെ വേഷമാണ് ജ്യോതികയ്ക്ക് ലഭിച്ചിരിക്കുന്നത്. ഇരുവരും സിനിമയിൽ ഒന്നിച്ചെത്തുന്നു എന്ന വാർത്ത സിനിമാലോകം ഇതിനോടകം വരവേറ്റിരുന്നു. ഇരുവരും ‘കട്ടപ്പ’ സത്യരാജിന്റെ മക്കളായാണെത്തുക. ഇവരുടെ കഥാപാത്രങ്ങൾ ഇങ്ങനെയാണെന്നതിന് സ്ഥിരീകരിച്ച റിപ്പോർട്ടുകൾ പുറത്തു വന്നിട്ടുണ്ട്. ആദ്യമായാണ് ജ്യോതികയും സൂര്യയുടെ അനുജൻ കാർത്തിയും ഒന്നിച്ചഭിനയിക്കുന്നത്. ഒരു കുടുംബ ചിത്രമായാവും ഇത് തിയേറ്ററുകളിൽ എത്തുക.
ആദ്യ കാലങ്ങളിൽ തമിഴ് സിനിമകളിലെ ഹിറ്റ് ജോഡിയായിരുന്നു സൂര്യയും ജ്യോതികയും. 2006ൽ ആയിരുന്നു ഇവരുടെ വിവാഹം. വർഷങ്ങളുടെ ഇടവേളക്കു ശേഷം 2015 ൽ ഇറങ്ങിയ മലയാള ചിത്രം ഹൗ ഓൾഡ് ആർ യൂവിന്റെ തമിഴ് പതിപ്പിലൂടെയാണ് ജ്യോതിക വീണ്ടും അഭിനയ രംഗത്തു സജീവമായത്.