‘മരിച്ചിട്ടും മകനെ കൊന്നുകൊണ്ടിരിക്കുന്നു, സുധാകരന്റെ പാര്‍ട്ടിക്ക് വോട്ട് കൊടുത്ത എനിക്ക് നീതി കിട്ടിയില്ല’: മാധ്യമങ്ങള്‍ക്ക് മുന്നില്‍ പൊട്ടിക്കരഞ്ഞ് ധീരജിന്റെ അച്ഛന്‍

കെപിസിസി അധ്യക്ഷന്‍ കെ. സുധാകരനെതിരെ ഇടുക്കി എന്‍ജിനീയറിംഗ് കോളജില്‍ കുത്തേറ്റ് മരിച്ച ധീരജിന്റെ പിതാവ്. മരിച്ചിട്ടും മകനെ കൊന്നു കൊണ്ടിരിക്കുകയാണെന്നും കുടുംബത്തെയും അപമാനിക്കുകയാണെന്നും ധീരജിന്റെ പിതാവ് ആരോപിച്ചു. മാധ്യമങ്ങളോടാണ് ധീരജിന്റെ അച്ഛന്റെ പ്രതികരണം. മാധ്യമങ്ങള്‍ക്ക് മുന്നില്‍ പൊട്ടിക്കരഞ്ഞാണ് ധീരജിന്റെ അച്ഛനെത്തിയത്.

സുധാകരനും കോണ്‍ഗ്രസും നടത്തുന്ന അപവാദ പ്രചാരണം സഹിക്കാനാകുന്നില്ലെന്നും ധീരജിന്റെ അച്ഛന്‍ പറയുന്നു. സുധാകരന്റെ പാര്‍ട്ടിക്ക് വോട്ട് കൊടുത്ത തനിക്ക് നീതി കിട്ടിയില്ല. താങ്ങാനാവാത്തത് കൊണ്ടാണ് വീണ്ടും മാധ്യമങ്ങള്‍ക്ക് മുന്നില്‍ എത്തിയതെന്നും ധീരജിന്റെ അച്ഛന്‍ പറഞ്ഞു.

ധീരജിന്റെ മരണം ഇരന്നുവാങ്ങിയതെന്ന വാക്ക് നല്ല വാക്കല്ലെന്ന് കെ.സുധാകരന്‍ എം.പി പിന്നീട് പറഞ്ഞിരുന്നു. കെഎസ്‌യു, യൂത്ത് കോണ്‍ഗ്രസ് കുട്ടികള്‍ നിരപരാധികളാണെന്ന് വ്യക്തമാക്കാന്‍ വേണ്ടിയാണ് ആ വാക്ക് ഉപയോഗിച്ചത്. നിഖില്‍ പൈലി ആരേയും കൊല്ലാന്‍ പോയിട്ടില്ല. കെ എസ് യു കുട്ടികള്‍ക്ക് സംരക്ഷണം ഒരുക്കാന്‍ പോയവരാണ്. അവരെ ഡിവൈഎഫ്‌ഐ, സിപിഐഎം, എസ്എഫ്‌ഐ ഗുണ്ടകള്‍ ഉപദ്രവിക്കാന്‍ വളഞ്ഞപ്പോള്‍ രക്ഷപ്പെടാനായി ഓടി. അവര്‍ തിരിച്ചടിക്കാനോ കുത്താനോ നിന്നവരല്ല. അക്രമി സംഘത്തില്‍ നിന്ന് രക്ഷപ്പെട്ടോടിയ നിഖില്‍ പൈലി ധീരജിനെ കുത്തിയിട്ടില്ല. അവരുടെ ഈ നിരപരാധിത്വം പറയാനാണ് ഇരന്നുവാങ്ങിയത് എന്ന് താന്‍ പറഞ്ഞതെന്നും കെ.സുധാകരന്‍ വിശദീകരിച്ചിരുന്നു. ജനുവരി 10 നായിരുന്നു ഇടുക്കി എന്‍ജിനീയറിങ് കോളജ് വളപ്പില്‍ കുത്തേറ്റ് മരിച്ചത്.