ലൈംഗിക പീഡനക്കേസില് പ്രതിയായ സാംസ്കാരിക പ്രവര്ത്തകന് സിവിക് ചന്ദ്രന് സംസ്ഥാനം വിട്ടെന്നും മുന്കൂര് ജാമ്യത്തിനായി ശ്രമം തുടങ്ങിയെന്നും പൊലീസ്. ഒരാഴ്ചക്കകം നടപടിയെടുത്തില്ലെങ്കില് ഉത്തരമേഖ ഐജി ഓഫിസിന് മുന്നില് പ്രക്ഷോഭം തുടങ്ങാനാണ് ദളിത് സംഘടനകളുടെ തീരുമാനം.
അധ്യാപികയും എഴുത്തുകാരിയുമായ വ്യക്തിയുടെ പരാതിയില് കഴിഞ്ഞയാഴ്ചയാണ് കൊയിലാണ്ടി പൊലീസ് സിവിക് ചന്ദ്രനെതിരെ കേസ് എടുത്തത്. ബലാത്സംഗം, സ്ത്രീത്വത്തെ അപമാനിക്കല് തുടങ്ങിയ വകുപ്പുകള്ക്കൊപ്പം പട്ടികജാതി പട്ടികവര്ഗ്ഗ വിഭാഗങ്ങള്ക്കെതിരായ അതിക്രമ നിയമ പ്രകാരവുമാണ് കേസ്. എന്നാല് ഇതുവരെ സിവികിനെ കണ്ടെത്താനോ നടപടികള് പൂര്ത്തിയാക്കാനോ കഴിഞ്ഞിട്ടില്ല. പരാതി ഉയര്ന്നയുടന് സിവിക് തമിഴ്നാട്ടിലേക്ക് കടന്നെന്നാണ് വിവരം. ഫോണ് സ്വിച്ച്ഡ് ഓഫാണ്.
കോഴിക്കോട് ജില്ലാകോടതി വഴി സിവിക് മുന്കൂര് ജാമ്യാപേക്ഷയ്ക്ക് ശ്രമിക്കുന്നുണ്ടെന്നാണ് പൊലീസിന് കിട്ടിയ വിവരം. പരാതിക്കാരിയായ അധ്യാപികയുടെ വിശദമായ മൊഴി വടകര ഡിവൈഎസ്പിയുടെ നേതൃത്വത്തിലുളള അന്വേഷണ സംഘം രേഖപ്പെടുത്തി. സാക്ഷികളില്നിന്നുളള മൊഴിയെടുപ്പ് പുരോഗമിക്കുകയാണ്. സംഭവ സ്ഥലത്ത് അധ്യാപികയെ എത്തിച്ച് തെളിവെടുപ്പും പൊലീസ് പൂര്ത്തിയാക്കി. സിവികിനെ ഉടന് കണ്ടെത്തുമെന്നും പൊലീസ് അറിയിച്ചു.