കരിപ്പൂര് സ്വര്ണക്കവര്ച്ച കേസില് അര്ജുന് ആയങ്കി അറസ്റ്റില്. കണ്ണൂര് പയ്യന്നൂരിനടുത്ത് പെരിങ്ങലില് നിന്നാണ് അര്ജുന് ആയങ്കിയെ കരിപ്പൂര് പൊലീസ് അറസ്റ്റ് ചെയ്തത്. കേസില് നാലംഗ സംഘം നേരത്തെ പിടിയിലായിരുന്നു. ഇവര് സ്വര്ണക്കവര്ച്ചക്ക് എത്തിയത് അര്ജുന് ആയങ്കിയുടെ നിര്ദേശ പ്രകാരമാണെന്നാണ് പൊലീസിന്റെ കണ്ടെത്തല്. ഇതിന്റെ അടിസ്ഥാനത്തിലാണ് നടപടി.
ഈ മാസം പത്തിനാണ് കേസിനാസ്പദമായ സംഭവം നടക്കുന്നത്. കരിപ്പൂരില് സ്വര്ണക്കവര്ച്ചാ സംഘത്തിനെ പൊലീസ് പിടികൂടിയിരുന്നു. കാരിയറില് നിന്ന് സ്വര്ണം തട്ടിയെടുക്കാനായിരുന്നു ഇവരുടെ പദ്ധതി. പരപ്പനങ്ങാടി സ്വദേശി മൊയ്ദീന് ഹാജിയുടെ നേതൃത്വത്തിലുള്ള സംഘത്തെ രഹസ്യ വിവരത്തിന്റെ അടിസ്ഥാനത്തില് പൊലീസ് പിടികൂടുകയായിരുന്നു.
മറ്റൊരാള്ക്ക് സ്വര്ണം കൈമാറുന്നതിനിടെ കവര്ച്ച ചെയ്യപ്പെട്ടു എന്ന രീതിയില് തട്ടിപ്പ് നടത്താനായിരുന്നു ഇവരുടെ പദ്ധതി. കരിയര് ഉള്പ്പടെ അഞ്ച് പേരാണ് അന്ന് പൊലീസ് പിടിയിലായത്. ഇവരെ വിശദമായി ചോദ്യം ചെയ്തതിലാണ് അര്ജുന് ആയങ്കിയുടെ പങ്ക് വെളിപ്പെട്ടത്.