ഭര്‍ത്താവിന്റെ മരണമുണ്ടാക്കിയ ആഘാതത്തില്‍ നിന്നും പുറത്ത് കടന്നിട്ടില്ല; രണ്ടാം വിവാഹ വാര്‍ത്തയോട് പ്രതികരിച്ചു മീന

ഈ അടുത്തായിരുന്നു നടി മീനയുടെ ഭര്‍ത്താവ് വിദ്യാസാഗറിന്റെ മരണം. ഭര്‍ത്താവിന്റെ വേര്‍പാട് മീനയെ മാനസികമായി തളര്‍ത്തിയിരുന്നു. ഈ സമയത്ത് തനിക്കൊപ്പം നിന്നവരെ കുറിച്ചെല്ലാം മീന പറഞ്ഞിരുന്നു. പ്രതിസന്ധി നിറഞ്ഞ സമയത്താണ് നമ്മള്‍ എത്ര ശക്തരാണെന്ന് സ്വയം തിരിച്ചറിയുന്നത് എന്ന് നടി പറഞ്ഞിരുന്നു.

ആ സമയത്ത് തന്നെ ആശ്വസിപ്പിക്കാന്‍ നിരവധി പേര്‍ ഉണ്ടായിരുന്നു. സുഹൃത്തുക്കള്‍ തനിക്ക് വലിയ പിന്തുണ നല്‍കി. എപ്പോഴും അവരുടെ സാമീപ്യം അറിയിച്ചു. അതിനാല്‍ തന്നെ ദുഖങ്ങള്‍ മറക്കാന്‍ തുടങ്ങിയെന്നും മീന പറഞ്ഞിരുന്നു. പരിചയമില്ലാത്തവര്‍ പോലും തന്നെ ആശ്വസിപ്പിച്ചു. വ്യക്തിപരമായ നഷ്ടം പോലെ അവര്‍ എന്റെ ദുഖത്തില്‍ പങ്കുചേര്‍ന്നു. ഇത്തരം ഘട്ടങ്ങളിലാണ് ആരെല്ലാം നമുക്ക് ഒപ്പമുണ്ടെന്ന് തിരിച്ചറിയുന്നത് മീന പറഞ്ഞു.

ഈ അടുത്താണ് മീന രണ്ടാം വിവാഹത്തിന് ഒരുങ്ങുന്നു എന്ന തരത്തിലുള്ള വാര്‍ത്ത പുറത്തുവന്നത്. മീനയെ പരിചയമുള്ള ആള്‍ തന്നെയാണ് വരന്‍ എന്നും റിപ്പോര്‍ട്ടില്‍ പറഞ്ഞിരുന്നു. തെലുങ്ക് മാധ്യമങ്ങളാണ് ഈ വാര്‍ത്ത പുറത്തുവിട്ടത്. ഇപ്പോഴിതാ ഇതില്‍ പ്രതികരിച്ചിരിക്കുകയാണ് മീന.

ഇത്തരം തെറ്റായ വാര്‍ത്തകള്‍ പ്രചരിപ്പിക്കരുതെന്ന് ആവശ്യപ്പെട്ട മീന ഭര്‍ത്താവിന്റെ മരണമുണ്ടാക്കിയ ആഘാതത്തില്‍ നിന്നും താന്‍ പുറത്ത് കടന്നിട്ടില്ലെന്നും തന്റെ സ്വകാര്യതയെ മാനിക്കണമെന്നും അഭിപ്രായപ്പെട്ടു.