​ഭാര്യയുടെ അടി വാങ്ങുന്നു സ്വന്തം അച്ഛനെയും സഹോദരിമാരെയും ചതിക്കുന്നു ​ഗണേഷ് കുമാറിന് ആസക്തി പെണ്ണിനോടും പണത്തോടും മാത്രം

ഗണേഷ് കുമാറിനെതിരെ ആഞ്ഞടിച്ച് വെള്ളാപ്പള്ളി നടേശൻ.പണം സമ്പാദിക്കുന്നതിന് വേണ്ടി ഏത് അതിര് വരെയും പോകുന്ന രാഷ്ട്രീയ നേതാക്കള്‍ ജനാധിപത്യത്തിലെ പുഴുക്കുത്തുകളാണെന്ന് എസ്.എൻ.ഡി.പി. യോഗം ജനറൽ സെക്രട്ടറി വെള്ളാപ്പള്ളി നടേശൻ പറഞ്ഞു. ഉമ്മൻചാണ്ടിയെ വേട്ടയാടാന്‍ വേണ്ടി ശ്രമിച്ചവരുടെ സത്യങ്ങൾ സി.ബി.ഐ അന്വേഷിച്ചതോടെ പുറത്തുവന്നിട്ടുണ്ടെന്നും അദ്ദേഹം ചൂണ്ടിക്കാട്ടി. പത്തനംതിട്ടയിൽ മാധ്യമങ്ങളോട് സംസാരിക്കുകയായിരുന്നു അദ്ദേഹം.പത്തനംതിട്ട ജില്ലയില്‍ നിന്നുള്ള ഒരു എം.എല്‍.എ. കഴിഞ്ഞ മന്ത്രിസഭയില്‍ ഉമ്മന്‍ചാണ്ടി മന്ത്രിയാക്കാത്തതിന്റെ പ്രതികാരത്തില്‍ എന്തെല്ലാം വൃത്തികേടുകളാണ് ചെയ്തത്. അദ്ദേഹം തന്നെ ഒറ്റായാളും ഒറ്റ പാര്‍ട്ടിയും ഒറ്റ എം.എല്‍.എയും. വിത്തുഗുണം പത്തുഗുണം.

ഇതേ വ്യക്തി ഭാര്യയുടെ അടി വാങ്ങുന്നു. കുടുംബത്തിലെ സ്വത്തുക്കള്‍ പങ്കിടുന്നതില്‍ തര്‍ക്കം. സ്വന്തം അച്ഛനെയും സഹോദരിമാരെയും ചതിക്കുന്നു. ഈ ആളുകളൊക്കെയാണ് മന്ത്രിമാരാകാന്‍ വരുന്നതെന്നും വെള്ളാപ്പള്ളി ആരോപിച്ചു.മാന്യനല്ലാത്ത ആളാണ് ഗണേഷ്. രണ്ട് ആസക്തിയാണ് അയാൾക്ക്. സാമ്പത്തിക ആസക്തിയും പെണ്ണിനോടുള്ള ആസക്തിയുമാണവ. അദ്ദേഹത്തെ ഡയറക്ടർ ബോർഡിൽ ഉൾപ്പെടുത്തിയതിൽ എൻ.എസ്.എസ്. ദുഖിക്കുന്നുണ്ടാവും. മാന്യനായ കലഞ്ഞൂർ മധുവിനെ പുറത്താക്കിയിട്ടാണ് ഗണേഷിനെ ഉൾപ്പെടുത്തിയത്.

ഇവരൊക്കെ ഘടകക്ഷി എന്ന നിലയിൽ മറ്റുള്ള പാര്‍ട്ടിക്കാരുടെ പിന്‍ബലത്തിലാണ് ജയിക്കുന്നത്. അല്ലാത്ത സാഹചര്യത്തില്‍ ഒറ്റയ്ക്ക് മത്സരിച്ചാല്‍ കെട്ടിവച്ച കാശ് പോലും ഇവര്‍ക്കൊന്നും കിട്ടില്ല. ആ വ്യക്തി ജയിക്കുന്നത് സ്വന്തം ബലം കൊണ്ടല്ല, മറിച്ച് ഒരു മുന്നണിയുടെ ബലം കൊണ്ടാണെന്നും അദ്ദേഹം ചൂണ്ടിക്കാട്ടി. അദ്ദേഹത്തിന്റെ കൂടെ നിന്ന പഴയ മന്ത്രിമാരില്‍ തന്നെ ചില ആളുകളും ഉമ്മൻചാണ്ടിയെ വേട്ടയാടാൻ ശ്രമിച്ചു. അദ്ദേഹത്തിന് ശേഷം മുഖ്യമന്ത്രിയാകണമെന്ന് ആഗ്രഹിച്ച ഒരു മാന്യനുണ്ടായിരുന്നു. ഉമ്മന്‍ചാണ്ടിയുടെ കൂടെ നിന്ന് മന്ത്രിയായതിന് ശേഷം പിന്നീട് ഇദ്ദേഹം കാലുവാരി. സ്ഥാനത്തിന് വേണ്ടി എന്തെല്ലാം കാര്യങ്ങളാണ് അദ്ദേഹം ചെയ്തത്.