ഫൈവ് സ്റ്റാര്‍ ഹോട്ടലെന്ന് കരുതി ആളുകള്‍ റൂം ചോദിച്ച് സ്‌കൂളില്‍ ചെല്ലുന്നു’; കേരളത്തിലെ സ്‌കൂളുകളുടെ നിലവാരത്തെക്കുറിച്ച് വിദ്യാഭ്യാസ മന്ത്രി വി ശിവന്‍കുട്ടി

തൃശ്ശൂര്‍: റോഡരികിലുള്ള വിദ്യാഭ്യാസ സ്ഥാപനങ്ങളുടെ കെട്ടിടങ്ങള്‍ കണ്ട് ആളുകള്‍ ഫൈവ് സ്റ്റാര്‍ ഹോട്ടലെന്ന് തെറ്റിദ്ധരിച്ച് റൂം ഉണ്ടോ എന്നുചോദിച്ച് ചെല്ലുകയാണെന്ന് വിദ്യാഭ്യാസ മന്ത്രി വി. ശിവന്‍കുട്ടി. കേരളത്തിലെ വിദ്യാലയങ്ങളുടെ നിലവാരത്തേക്കുറിച്ച് നവകേരള സദസ്സില്‍ സംസാരിക്കുകയായിരുന്നു മന്ത്രി.

അയ്യായിരം കോടി രൂപയാണ് കേരളത്തിലെ വിദ്യാലയങ്ങള്‍ക്കുവേണ്ടി മുടക്കിയത്. ‘പലരും റോഡ് സൈഡിലിരിക്കുന്ന കെട്ടിടങ്ങള്‍ കണ്ട് ഫൈവ് സ്റ്റാര്‍ ഹോട്ടലാണോ എന്ന് തെറ്റിദ്ധരിച്ച് റൂം ഉണ്ടോ എന്ന് ചോദിച്ച് കയറിച്ചെല്ലുന്നു.

ഇവിടെ ഇരിക്കുന്ന പ്രായം ചെന്നവര്‍ക്കൊക്കെ തോന്നും ഒന്നുകൂടി സ്‌കൂളില്‍ ചെന്നിരിക്കാന്‍. കുടുംബശ്രീയുടെ ആള്‍ക്കാര്‍ പലരും സ്‌കൂളുകളില്‍ പോകുന്നുണ്ടെന്നാണ് മന്ത്രി രാധാകൃഷ്ണന്‍ പറഞ്ഞത്.

വയനാട്ടില്‍ കഴിഞ്ഞ ദിവസം ഒരു സ്‌കൂള്‍ ഉദ്ഘാടനത്തിന് ചെന്നു. പാമ്പുകടിയേറ്റ് മരിച്ച കുട്ടിയുടെ സ്‌കൂള്‍. അഞ്ചു കോടി രൂപ മുടക്കി സ്‌കൂള്‍ കെട്ടിടം നിര്‍മ്മിച്ചു എന്ന് മാത്രമല്ല, ആദ്യത്തെ ലിഫ്റ്റ് വെച്ച സര്‍ക്കാര്‍ വിദ്യാലയമായി മാറ്റുകയും ചെയ്തു’, മന്ത്രി പറഞ്ഞു.

വിദ്യാഭ്യാസ കച്ചവടം അവസാനിപ്പിച്ച സംസ്ഥാനമാണ് കേരളം. വീണ്ടും ഇത് അണ്‍ എയ്ഡഡ് മേഖലയില്‍ കൊണ്ടുവരാന്‍ പരിശ്രമിക്കരുത്. അങ്ങനെ പരിശ്രമിച്ചാല്‍ കര്‍ശന നിലപാട് സ്വീകരിക്കും. അനാവശ്യമായി കുട്ടികളില്‍നിന്ന് പണംപിരിക്കാനും സാമ്പത്തിക ബാധ്യത വരുത്താനും പാടില്ല, മന്ത്രി പറഞ്ഞു.

എയ്ഡഡ് മേഖലയിലും സര്‍ക്കാര്‍ മേഖലയിലും പഠിക്കുന്ന വിദ്യാര്‍ഥികള്‍ കേരളത്തിന്റെ മക്കളാണെന്ന മനോഭാവം തന്നെയാണ് സര്‍ക്കാരിനുള്ളതെന്നും മന്ത്രി കൂട്ടിച്ചേര്‍ത്തു.