പുഷ്പാ 2-ൽ നിന്നും വലിയൊരു മാജിക് ആണ് പ്രേക്ഷകർ എന്നിൽ നിന്നും പ്രതീക്ഷിക്കുന്നത്, പക്ഷേ ഞാൻ ഈ സിനിമ ചെയ്യുന്നത് ഒരേയൊരു കാരണം കൊണ്ടാണ് – ഫഹദ് ഫാസിലിന്റെ പ്രതികരണം ഇങ്ങനെ, തെലുങ്ക് സിനിമകളെ താരം വിലകുറച്ചു കാണുന്നു എന്ന് വിമർശനം

മലയാളികൾക്ക് ഏറെ പ്രിയപ്പെട്ട താരങ്ങളിൽ ഒരാളാണ് ഫഹദ് ഫാസിൽ. ഇദ്ദേഹം മലയാളം സിനിമയ്ക്ക് പുറമെ നിരവധി അന്യഭാഷാ സിനിമകളിലും അഭിനയിച്ചിട്ടുണ്ട്. അത്തരത്തിൽ ഇദ്ദേഹം അഭിനയിച്ച ഒരു തെലുങ്ക് സിനിമയായിരുന്നു പുഷ്പ. അല്ലു അർജുനാണ് സിനിമയിലെ കേന്ദ്ര കഥാപാത്രത്തെ അവതരിപ്പിച്ചത്. ഈ സിനിമയിൽ വില്ലൻ വേഷമാണ് ഫഹദ് കൈകാര്യം ചെയ്തത്. ബൻവർ സിംഗ് ശേഖാവത് എന്ന കഥാപാത്രത്തെയാണ് ഫഹദ് ഈ സിനിമയിൽ അവതരിപ്പിച്ചത്. ഇപ്പോൾ ഈ കഥാപാത്രം തൻറെ കരിയറിൽ പ്രത്യേകിച്ച് മാറ്റങ്ങൾ ഒന്നും വരുത്തിയിട്ടില്ല എന്നാണ് ഇദ്ദേഹം പറയുന്നത്.

ഫിലിം കമ്പനി എന്ന ഓൺലൈൻ ചാനലിന് നൽകിയ അഭിമുഖത്തിലാണ് ഇദ്ദേഹം ഈ കാര്യം പറഞ്ഞത്. സിനിമയുടെ ഒന്നാം ഭാഗത്തിൽ ആണ് ഇദ്ദേഹം വില്ലനായി എത്തിയത്. സിനിമയുടെ അവസാന 20 മിനിറ്റ് മാത്രമാണ് ഫഹദ് വന്നുപോയത്. എന്നാൽ രണ്ടാം ഭാഗത്തിൽ ഫഹദ് ആയിരിക്കും പ്രധാനപ്പെട്ട വില്ലൻ എന്നാണ് അറിയാൻ സാധിക്കുന്നത്. ഇപ്പോൾ ഈ സിനിമയെ കുറിച്ചുള്ള ഫഹദിന്റെ പരാമർശം ആണ് വൈറലായി മാറിക്കൊണ്ടിരിക്കുന്നത്.

“പുഷ്പാ സിനിമയുടെ രണ്ടാം ഭാഗം റിലീസിന് വലിയൊരു മാജിക് ആണ് പ്രേക്ഷകർ എൻറെ ഭാഗത്തുനിന്നും പ്രതീക്ഷിക്കുന്നത്. എന്നാൽ യഥാർത്ഥത്തിൽ ഞാൻ ഈ സിനിമ ചെയ്യുവാൻ കാരണം സുകുമാർ സാറിനോട് ഉള്ള എൻറെ സ്നേഹം കൊണ്ട് മാത്രമാണ്. അദ്ദേഹത്തോടുള്ള ബഹുമാനം കൊണ്ട് മാത്രമാണ് ഞാൻ ഈ സിനിമ ചെയ്തത്. എനിക്ക് ചെയ്യാനുള്ളതെല്ലാം ഞാൻ ഇവിടെ ചെയ്യുന്നുണ്ട്. എനിക്ക് ആരോടും ബഹുമാന കുറവില്ല, എൻറെ ജീവിതം മലയാളം സിനിമയാണ്” – ഫഹദ് ഫാസിൽ പറയുന്നു.

അതേസമയം ഫഹദ് ഫാസിൽ തെലുങ്ക് സിനിമകളെ വിലകുറച്ചു കാണുകയാണ് ഈ പരാമർശത്തിലൂടെ എന്നാണ് ഈ വീഡിയോയുടെ താഴെയുള്ള ഒന്ന് രണ്ട് കമന്റുകൾ സൂചിപ്പിക്കുന്നത്. എന്നാൽ അങ്ങനെയൊന്നുമില്ല എന്നും മാതൃഭാഷയോടുള്ള സ്നേഹം മാത്രമാണ് ഫഹദ് ഫാസിൽ ഈ കമന്റിലൂടെ പ്രഖ്യാപിച്ചിരിക്കുന്നത് എന്നും സമാനമായ കമൻറ് തന്നെയായിരിക്കും അല്ലു അർജുനോട് ഈ വിഷയത്തെക്കുറിച്ച് ചോദിച്ചാൽ അദ്ദേഹം തെലുങ്ക് സിനിമയെ കുറിച്ച് പറയുന്നത് എന്നുമാണ് പ്രേക്ഷകർ പറയുന്നത്.