കൃത്രിമ ഗര്‍ഭധാരണത്തിലൂടെയാണ് കുഞ്ഞിന് ജന്മം നല്‍കിയത്; എഴുപത്തൊന്നുകാരി പ്രസവിച്ച കുഞ്ഞ് പാല്‍ തൊണ്ടയില്‍ കുടുങ്ങി മരിച്ചു

കുറച്ച് ദിവസം മുമ്പാണ് എഴുപത്തൊന്നുകാരി കൃത്രിമ ഗര്‍ഭധാരണത്തിലൂടെ ഒരു പെണ്‍കുഞ്ഞിന് ജന്മം നല്‍കി എന്ന വാര്‍ത്ത സോഷ്യല്‍ മീഡിയയില്‍ എത്തിയത്. വളരെ സന്തോഷത്തോടെയാണ് ഈ വാര്‍ത്തയെ വായനക്കാര്‍ നോക്കി കണ്ടത്. എന്നാലും ഇതിനിടെ ചില ആശങ്കകള്‍ ഉണ്ടായിരുന്നു. ഇത്രയും പ്രായമായതിനാല്‍ കുഞ്ഞിന് ആരോഗ്യ പ്രശ്‌നങ്ങള്‍ ഉണ്ടാവുമോ എന്നൊക്കെയുള്ള സംശയം ഉയര്‍ന്നിരുന്നു. ഇപ്പോള്‍ ആ കുഞ്ഞ് മരണപ്പെട്ടു എന്ന ദുഖവാര്‍ത്തയാണ് പുറത്തുവന്നത്. ഒരു വലിയ സന്തോഷത്തിന് പിന്നാലെ വന്ന സംങ്കടകരമായ വാര്‍ത്തയായിരുന്നു ഇത്.

തിങ്കളാഴ്ച വൈകിട്ട് പാല്‍ തൊണ്ടയില്‍ കുടുങ്ങി അസ്വസ്ഥതയുണ്ടായ കുഞ്ഞിനെ ആലപ്പുഴ മെഡിക്കല്‍ കോളജ് ആശുപത്രിയില്‍ എത്തിച്ചെങ്കിലും രക്ഷപ്പെടുത്താന്‍ കഴിഞ്ഞില്ല, അന്ന് രാത്രി തന്നെ കുഞ്ഞ് മരിക്കുകയായിരുന്നു. ശസ്ത്രക്രിയയിലൂടെ ജനിച്ച കുഞ്ഞിന് തൂക്കവും പ്രതിരോധ ശക്തിയും കുറവായതിനാല്‍ 40 ദിവസം ആശുപത്രിയില്‍ നിരീക്ഷണത്തില്‍ കഴിഞ്ഞിരുന്നു. പിന്നാലെ ആരോഗ്യ സ്ഥിതി മെച്ചപ്പട്ടതോടെയാണ് കഴിഞ്ഞ 28ന് രാമപുരത്തെ വീട്ടിലേക്ക് കൊണ്ടുവന്നത്. കുഞ്ഞിന്റെ എല്ലാ കാര്യങ്ങളും സുധര്‍മയും സുരേന്ദ്രനും നന്നായി ശ്രദ്ധിച്ചെങ്കിലും അപ്രതീക്ഷിതമായാണ് ഈ ദുരന്തം വന്നത്.

വീണ്ടും അച്ഛനും അമ്മയും ആയതിന്റെ സന്തോഷത്തിലായിരുന്നു സുധര്‍മയും സുരേന്ദ്രനും . ഒന്നര വര്‍ഷം മുമ്പാണ് ഇവരുടെ മകന്‍ സുജിത്ത് മരണപ്പെട്ടത്. പിന്നാലെയാണ് താന്‍ ഒരു കുഞ്ഞിനും കൂടി ജന്മം നല്‍കാന്‍ തീരുമാനിച്ചത്. എന്നാല്‍ പ്രായം അതിന് തടസം ആണെന്ന് പലരും ചൂണ്ടികാണിച്ചിരുന്നു. ഡോക്ടര്‍മാര്‍ പോലും സുധര്‍മയെ ഇതില്‍ നിന്നും പിന്തിരിപ്പിക്കാന്‍ ശ്രമിച്ചു, എന്നാല്‍ നടന്നില്ല. ശേഷം മാര്‍ച്ച് 18ന് സുധര്‍മയ്ക്ക് കുഞ്ഞ് ജനിച്ചത്. ഇപ്പോള്‍ ആ കുഞ്ഞ് മരണപ്പെട്ടു എന്ന വാര്‍ത്ത പ്രേക്ഷകരെയും സംങ്കടത്തില്‍ ആക്കിയിരിക്കുകയാണ്.