എയര് ഇന്ത്യ സ്റ്റാഫിലെ ഉദ്യോഗസ്ഥനെതിരെ വ്യാജപീഡന പരാതി ചമച്ചെന്ന കേസില് ക്രൈംബ്രാഞ്ച് കുറ്റപത്രം സമര്പ്പിച്ചതിന് പിന്നാലെ പ്രതികരിച്ച് സ്വപ്ന സുരേഷ്. നടപടിക്ക് പിന്നില് ശിവശങ്കറാണെന്ന് സ്വപ്ന ആരോപിച്ചു. തിടുക്കത്തില് കുറ്റപത്രം നല്കിയതിന് പിന്നില് ശിവശങ്കര് അധികാരം ഉപയോഗിച്ചിട്ടുണ്ടാകാം. ഇക്കാര്യങ്ങള് ജനങ്ങള് തീരുമാനിക്കട്ടെയെന്നും സ്വപ്ന സുരേഷ് പറഞ്ഞു.
തന്റെ തുറന്നു പറച്ചിലിന്റെ അനന്തരഫലമായിരിക്കാം നടപടികള്ക്ക് പിന്നില്. എന്തും നേരിടാന് തയ്യാറാണ്. തനിക്കെതിരെ ശിവശങ്കറിന്റെ തെറ്റായ ആരോപണങ്ങള്ക്ക് എതിരെ മാത്രമാണ് പ്രതികരിച്ചത്. ശിവശങ്കറിനൊപ്പം ആര് നില്ക്കും നില്ക്കില്ല എന്നത് തന്റെ വിഷയമല്ല. തനിക്കെതിരെ ഉയര്ന്ന ആരോപണങ്ങളില് പ്രതികരിച്ചേ എന്നുള്ളൂ എന്നും സ്വപ്ന കൂട്ടിച്ചേര്ത്തു.
എയര് ഇന്ത്യ ഉദ്യോഗസ്ഥനെതിരെ വ്യാജ പീഡന പരാതി നല്കിയ കേസില് സ്വപ്ന സുരേഷ് രണ്ടാം പ്രതിയാണ്. കേസില് എയര് ഇന്ത്യ സാറ്റ്സ് വൈസ് ചെയര്മാന് ബിനോയ് ജേക്കബാണ് ഒന്നാം പ്രതി. വ്യാജപരാതി ഉണ്ടാക്കിയത് സ്വപ്നയാണെന്നാണ് കുറ്റപത്രത്തില് പറയുന്നത്. എയര് ഇന്ത്യ ആഭ്യന്തര അന്വേഷണ സമിതിയെയും ക്രൈംബ്രാഞ്ച് പ്രതിചേര്ത്തിട്ടുണ്ട്. ഉദ്യോഗസ്ഥനെതിരെ വ്യാജ ലൈംഗിക പരാതിയുണ്ടാക്കാന് അന്വേഷണ സമിതി കൂട്ടുനിന്നുവെന്ന് കണ്ടെത്തല്. കേസില് ആകെ പത്ത് പ്രതികളാണുള്ളത്.