ഇന്ത്യൻ ടെലിവിഷൻ ചരിത്രത്തിലെ തന്നെ വിസ്മയകരമായ ഒരു ഏടാണ് ഐഡിയ സ്റ്റാർ സിംഗർ എന്ന പരിപാടി. ഏഷ്യാനെറ്റിൽ സംപ്രേക്ഷണം ചെയ്തിരുന്ന ഈ സംഗീത റിയാലിറ്റി ഷോ ഇന്ത്യയിലെതന്നെ ആദ്യ റിയാലിറ്റി ഷോകളിൽ ഒന്നായിരുന്നു. മലയാളികൾ അതുവരെ കാണാത്ത ദൃശ്യാനുഭവം ആയിരുന്നു ഐഡിയ സ്റ്റാർ സിംഗർ ഒരുക്കിയത്. രഞ്ജിനി ഹരിദാസ് എന്ന അവതാരികയും ഇവിടെ ജനിക്കുകയായിരുന്നു. മലയാളികൾ കണ്ടു പരിചയിച്ചിട്ടില്ലാത്ത ഇത്തരത്തിലുള്ള അവതരണമായിരുന്നു രഞ്ജിനിയുടെത്.
വളരെ ചുരുങ്ങിയ കാലംകൊണ്ട് ആയിരുന്നു ഐഡിയ സ്റ്റാർ സിംഗർ മലയാളികളുടെ ഇഷ്ട പരിപാടിയായി മാറിയത്. എട്ടോളം സീസണുകൾ പിന്നിട്ടിരുന്നു ഐഡിയ സ്റ്റാർ സിംഗർ. പിന്നീട് സംഗീത റിയാലിറ്റി ഷോകളുടെ കാലം കഴിഞ്ഞു എന്നു തോന്നിയ ഘട്ടത്തിലായിരുന്നു പരിപാടി നിർത്തിയത്. പിന്നീട് ഒരു ചാനലുകളിലും ഇത്തരത്തിലുള്ള പരിപാടികൾ കാണാറില്ലായിരുന്നു. ഇപ്പോൾ ഫ്ലവേഴ്സ് ടിവി, സീ കേരളം, മഴവിൽ മനോരമ ഇന്ന് ചാനലുകളെല്ലാം റിയാലിറ്റി ഷോകൾക്ക് വലിയ പ്രാധാന്യമാണ് നൽകുന്നത്. അതുകൊണ്ടുതന്നെ ഏഷ്യാനെറ്റിനും റിയാലിറ്റി ഷോകൾ അങ്ങനെ തള്ളിക്കളയാൻ സാധിക്കില്ല.
ഇപ്പോൾ പഴയ പരിപാടിയെ തന്നെ പുതുക്കി എടുക്കുകയാണ് ഏഷ്യാനെറ്റ്. മലയാളക്കരയിൽ ഇതിഹാസം തീർത്ത ഐഡിയ സ്റ്റാർ സിംഗർ എന്ന പരിപാടി പുതിയ രൂപത്തിൽ വീണ്ടും വരുന്നു.സ്റ്റാർ സിംഗർ എന്ന തന്നെയാണ് പരിപാടിയുടെ പേര്. മലയാളികളുടെ പ്രിയപ്പെട്ട സംഗീതജ്ഞർ ആയ സംഗീത സംവിധായകൻ ശരത്, ഗായകരായ ചിത്ര, മഞ്ചരി, സ്റ്റീഫൻ ദേവസ്സി, ജി വേണുഗോപാൽ എന്നിവരാണ് ഈ സീസണിൽ വിധികർത്താക്കളായി എത്തുന്നത്.
രഞ്ജിനി ഹരിദാസ് എന്ന അവതാരികയുടെ അവതരണമായിരുന്നു ഐഡിയ സ്റ്റാർ സിംഗർ എന്ന പരിപാടിയുടെ ഏറ്റവും വലിയ ഹൈലൈറ്റ്. എന്നാൽ ഇത്തവണ അവതാരികയായ രഞ്ജിനി ഹരിദാസ് ഉണ്ടാവില്ല. പകരം മലയാള സിനിമയിലെ പ്രശസ്ത നടിയായ ജൂവൽ മേരി ആയിരിക്കും ഇത്തവണ സ്റ്റാർ സിംഗർ അവതാരിക ആയിട്ട് എത്തുക. മെഗാസ്റ്റാർ മമ്മൂട്ടി നായകനായ ഉട്ടോപ്യയിലെരാജാവ് എന്ന ചിത്രത്തിലെ നായികയായി എത്തിയത് ജൂവൽ മേരി ആയിരുന്നു. എന്തായാലും പഴയ വിസ്മയം സ്റ്റാർ സിംഗർ പരിപാടി ആവർത്തിക്കുമോ എന്ന ആകാംക്ഷയിലാണ് മലയാളികൾ ഒന്നടങ്കം.