‘വിമര്‍ശനങ്ങളില്‍ കാര്യമുണ്ട്; കൂടുതല്‍ സെലക്ടീവ് ആകേണ്ട സമയമായി’: സൗബിന്‍ ഷാഹിര്‍ പറയുന്നു

സിനിമകള്‍ തെരഞ്ഞെടുക്കുമ്പോള്‍ താന്‍ കൂടുതല്‍ സെലക്ടീവ് ആകേണ്ട സമയമായെന്ന് നടന്‍ സൗബിന്‍ ഷാഹിര്‍. സമീപകാലത്ത് റിലീസ് ചെയ്ത ചില സിനിമകളിലെ അഭിനയത്തിന്റെ പേരില്‍ സോഷ്യല്‍ മീഡിയയില്‍ വന്ന വിമര്‍ശനങ്ങളില്‍ കാര്യമുണ്ട്. ബന്ധങ്ങളുടെ പുറത്ത് കഥ പോലും കേള്‍ക്കാതെയാണ് പല ചിത്രങ്ങളിലും അഭിനയിച്ചത്. വിമര്‍ശനങ്ങളെ ഉള്‍ക്കൊണ്ട് മുന്നോട്ടുപോകുമെന്നും സൗബിന്‍ ഷാഹിര്‍ പറഞ്ഞു. ട്രൂകോപ്പി തിങ്ക്‌സിന് നല്‍കിയ അഭിമുഖത്തിലാണ് സൗബിന്‍ ഷാഹിര്‍ ഇക്കാര്യം പറഞ്ഞത്.

അഭിനയത്തില്‍ തുടക്കക്കാരനായതു കൊണ്ട് സെലക്ടീവ് ആവേണ്ട അവസ്ഥയിലേക്ക് എത്തിയിരുന്നില്ല. ഇപ്പോഴാണല്ലോ അതിലേക്ക് എത്തുന്നത്. ഇനി വരുന്നവയില്‍ നോക്കിയും കണ്ടും ചെയ്യണമെന്ന അഭിപ്രായമാണ് എല്ലാവരില്‍ നിന്നും ലഭിക്കുന്നത്. ഇനി ‘നോ’ പറയാന്‍ തയ്യാറാകേണ്ടതുണ്ടെന്നും സൗബിന്‍ ഷാഹിര്‍ പറഞ്ഞു.

പതിനേഴാം വയസ് മുതല്‍ താന്‍ സിനിമയിലുണ്ട്. കുറേയധികം പേര്‍ സുഹൃത്തുക്കളായുണ്ട്. ഗുരുസ്ഥാനത്തും ജ്യേഷ്ഠ സ്ഥാനത്തുമെല്ലാം നില്‍ക്കുന്ന നിരവധി പേരുണ്ട്. അവര്‍ അവരുടെ പടത്തിലേക്ക് വിളിക്കുമ്പോള്‍ കഥ പൂര്‍ണമായി കേള്‍ക്കാതെ തന്നെ പോകാറുണ്ട്. അവരുടെ അടുത്ത് നോ പറയുക എന്നത് വളരെയധികം ബുദ്ധിമുട്ടാണ്. തിരക്കാണ് എന്ന് അവരുടെ അടുത്ത് പറയാന്‍ കഴിയില്ല. ഇനി കഥ പൂര്‍ണമായി കേട്ടശേഷമായിരിക്കും അഭിനയിക്കുകയെന്നും സൗബിന്‍ പറഞ്ഞു.

സുഹൃത്തുക്കളുടെ സിനിമകളില്‍ അഭിനയിക്കുമ്പോള്‍ കൂടുതല്‍ സ്വാതന്ത്ര്യമുണ്ടെന്നും അഭിപ്രായങ്ങള്‍ പറയാന്‍ പറ്റാത്ത സംവിധായകരുടെ സിനിമകളിലാണ് വിമര്‍ശിക്കപ്പെടുന്ന റോളുകള്‍ ചെയ്യേണ്ടി വന്നതെന്നും സൗബിന്‍ പറഞ്ഞു. കുറെ മോശം വേഷങ്ങളായപ്പോള്‍ അമല്‍ നീരദ് കുറച്ചധികം വഴക്കുപറഞ്ഞു. എല്ലാത്തിലും കയറി പിടിക്കണ്ട, കുറച്ച് ബ്രേക്കെടുക്ക് എന്ന് സുഹൃത്തുക്കള്‍ ഉപദേശിക്കാറുണ്ട്. പക്ഷേ, അപ്പോഴും ചില ബന്ധങ്ങളോട് നമുക്ക് നോ പറയാന്‍ പറ്റില്ലെന്നും സൗബിന്‍ കൂട്ടിച്ചേര്‍ത്തു.